خشمگین شدن خسرو از شیرین و رفتنش از ارمنستان
لە کتێبی:
شیرین و خوسرەو
بەرهەمی:
خانای قوبادی (1704-1778)
2 خولەک
525 بینین
خوسرەو دیش شیرین بەی تەور خرۆشا
تەڵخ بی چون بادە بە توندی جۆشا
خرابتەر جە تورک تایفەی بێ دین
بە غەزەب وستش نە ئەبرۆ سەد چین
ئەبرۆ چون کەمان زۆر شاخ پڕ پەی
بەستنەش سێ سەر بە خیشم پڕ وەی
موژان چون خەدەنگ بۆ میشک دڵ دۆز
کێشاش نە تەرکەش پەرێ شەڕ بە سوز
ملەرزا زەمین نە غەزەبناکێش
عەجەب مەند یەکسان ئەو جە بێ باکیش
ئەویچ بە توندی خێزا چون ئاتەش
بەست نە قەند وێنەی کەیانی تەرکەش
دیا بە سەد خیسم واتش بە شیرین
دەوڵەتت زیاد زوڵف بۆ عەبیرین
جە خاس شەرت وێت بەجا ئاوەردی
ئاخر یاونات مۆبەت بە سەردی
شەرت بۆ من جە قین تیر تانەی تۆ
ئەر گیانم پێش بۆ دەوڵەتخانەی تۆ
هەنی درەنگێ نەنیشووش تێدا
بە ڕاویاریچ نەویەرووش پێدا
یە وات و دەرلاد چون باد سوب خێز
نیشت چون سەهی سەرو نە پشت شەودێز
نە پشت شەودێز درەخشا چون نوور
خرۆشا بە خیشم تەهەمتەن دەستوور
وات شیرین سەوگەند بە تاج شاهی
بەجاهـ و جەلال زات ئیلاهی
بەقورس ڕەخشان خورشید خاوەر
بە خەرقەی تەجرید عیسا پەیغەمبەر
هیچ پەروام نیەن ڕۆی مەیدان و هەی
جە شۆڵەی ئاهیر، جە دەریای بێ پەی
جە ڕۆی هەمیجا شێر، چون پیل مەستم
دوشمن عاجزەن جە حەربەی دەستم
من یە عەشق تۆ زەبوونم کەردەن
پادشاهی و تەخت جە یادم بەردەن
پەی چێش؟ نەتیجەی عەشقت بێ درێخ
سەد چون قوللەی قاف ماوەرۆ جە بێخ
خەدەنگ غەمزەی وەنەوشە خاڵان
حەربەی نیم نیگای نازک نەوهاڵان
ئەر بگنۆ وە سەخت کۆی سەنگ خارا
مکەرۆش بە گەرد وە بێ مدارا
ئیسە سەودای تۆ بیەن دوچارم
زیندەگی بەی تەور بیەن بە ژارم
ماچی کۆن شاهی، کۆن تاج و تەختت؟
کۆن گەنج و ئەسباب، کۆن زەڕرین بەختت؟
عەشق تۆ بەی تەور بەردەن شنەختم
بێزار جە شاهی، جە تاج و تەختم
وەر نە نە دەوران عەرسەی هەفت کیشوەر
نمەیۆم نە چەم دارا و ئەسکەندەر
عەشق تۆ وەستەن، شیرین، من جە تەخت
هەم تۆ مدەی لێم تیر و تانەی سەخت
سا یە خاست کەرد شای سۆسەن خاڵان
سالار سەرکێش نازک نەوهاڵان
بێ گونە و تەقسیر کەردی مەعزوورم
بە دڵگیری دای ئاخر دەستوورم
من یا ڕاهی بیم، تۆ بنیش وە شاد
نمەک حەڵاڵ کەر، سا دەوڵەت زیاد