xişmigîn şidin xisru az şîrîn û riftinş az arministan
From the Book:
Şîrîn û Xusrew
By:
Khana Qubadi (1704-1778)
2 minutes
255 views
xusrew dîş şîrîn bey tewr xiroşa
tełx bî çun bade be tundî coşa
xirabter ce turk tayfey bê dîn
be ẍezeb wistiş ne ebro sed çîn
ebro çun keman zor şax piř pey
bestineş sê ser be xîşim piř wey
mujan çun xedeng bo mîşk dił doz
kêşaş ne terkeş perê şeř be suz
milerza zemîn ne ẍezebnakêş
’eceb mend yeksan ew ce bê bakîş
ewîç be tundî xêza çun ateş
best ne qend wêney keyanî terkeş
dya be sed xîsim watiş be şîrîn
dewłetit zyad zułf bo ’ebîrîn
ce xas şerit wêt beca awerdî
axir yawnat mobet be serdî
şerit bo min ce qîn tîr taney to
er gyanim pêş bo dewłetxaney to
henî direngê nenîşûş têda
be řawyarîç newyerûş pêda
ye wat û derlad çun bad sub xêz
nîşt çun sehî seru ne pişt şewdêz
ne pişt şewdêz direxşa çun nûr
xiroşa be xîşim tehemten destûr
wat şîrîn sewgend be tac şahî
becah û celal zat îlahî
bequrs řexşan xurşîd xawer
be xerqey tecrîd ’îsa peyẍember
hîç perwam nyen řoy meydan û hey
ce şołey ahîr, ce deryay bê pey
ce řoy hemîca şêr, çun pîl mestim
duşmin ’aczen ce ḧerbey destim
min ye ’eşq to zebûnim kerden
padşahî û text ce yadim berden
pey çêş? netîcey ’eşqit bê dirêx
sed çun qulley qaf mawero ce bêx
xedeng ẍemzey wenewşe xałan
ḧerbey nîm nîgay nazk newhałan
er bigno we sext koy seng xara
mikeroş be gerd we bê midara
îse sewday to byen duçarim
zîndegî bey tewr byen be jarim
maçî kon şahî, kon tac û textit?
kon genc û esbab, kon zeřrîn bextit?
’eşq to bey tewr berden şinextim
bêzar ce şahî, ce tac û textim
wer ne ne dewran ’ersey hefit kîşwer
nimeyom ne çem dara û eskender
’eşq to westen, şîrîn, min ce text
hem to midey lêm tîr û taney sext
sa ye xast kerd şay sosen xałan
salar serkêş nazk newhałan
bê gune û teqsîr kerdî me’zûrim
be diłgîrî day axir destûrim
min ya řahî bîm, to binîş we şad
nimek ḧełał ker, sa dewłet zyad