pasix dadin şîrîn xisru ra
From the Book:
Şîrîn û Xusrew
By:
Khana Qubadi (1704-1778)
2 minutes
529 views
be tundî watiş ye bê destûrin
ye ce řewyew řesim bizurgî dûren
sa xasen minîç çenî şa be germ
ce řû horderûn yekser perdey şerim
herçend şa pey min derdiş bê dewan
be kam mezhebê bê şermî řewan
’aşiq miradiş, bewr derya dił
be de’wa û be ceng nimebo ḧasił
şa derkarşen îmşew bê endêş
bawero we zor min we dest wêş
kes dostî be zor be kes nekerden
er kerdin, xusrew, serfe neberden
dostî ew xasen ce her dû ser bo
yekê wêney şehd, ew çun şeker bo
nek yekê şîrîn, yekê çun jar bo
dostî bey tewre be jar mar bo
bełê me’lûmen çiman bêhoşî
padşahêt şî, be ’eşq mekoşî
dest ce dewłet şahî horderden
duşminan textit teseřřuf kerden
çêge çenî min turk û tazîten
her xeyał ’eşq nezerbazîten
to carê çun şêr ẍuřendey sermest
bawer tac û text şahî wêt be dest
ewsa cew dima şay dara şiko
şirû’ ker be ’eşq nemaman no
wer ne ye pey to ’eybê ’ezîmen
text xusrewî ’ehdê qedîmen
dexiłş be to bo behram çobîn
bistano çenet ne řûy serzemîn
fîdat bam lałpoş mułk meda’în
mewaçe pûç gon ey tar tayn
şay saḧêb namûs nadîrey eyyam
ga dest be têẍen, gahê des be cam
nek her meyl be cam badey diłkeş bo
giruftar be lûl zułf çaw řeş bo
padşahî û text werdero ce dest
bigêło ne pey řendan çaw mest
bê demax meber şay ferîdûn feř
be kêş şahan tac û kemer zeř
şahê bey tewr bo nîko bext nyen
zêbendey tomar tac û text nyen