نصیحت کردن مهین بانو شیرین را در باب خسرو که او را بازی ندهد
لە کتێبی:
شیرین و خوسرەو
بەرهەمی:
خانای قوبادی (1704-1778)
3 خولەک
568 بینین
نەققاش ئەی نەقش شۆخ عەنبەرین
بەی دەستوور کەرد نەقش ئەی نامەی شیرین
بانوو چون بە فەڕ شای واڵا تەبار
یاونا بە چەرخ فەرق ئیفتیخار
جە تەرس شیرین شەیدایی پەروێز
ملەرزا چون شاخ سەوڵ سەراوێز
پەی چێش هەرکەسێ دەروونش پاکەن
نەجیبەن بێ عەیب، ساحێب ئیدارەکەن
خۆف ناپاکان دایم هەر پێشەن
تا زیندەن جێشان هەر بە ئەندێشەن
بانوو مزانا بە کار خوسرەو
بە عەشق شیرین نەزەربازی ئەو
واتش بە شیرین بەرگوزیدەی من
فرزەند عەزیز نوور دیدەی من
جە قاف تا بە قاف بەهای نازتەن
شەکەر شەرمندەی ڕێزەی ڕازتەن
چون تۆ ئاهوویێ نە موڵک ئەرمەن
نیەن نە عەرسەی خەتا تا خوتەن
باڵات بێ عەیبەن، حەق شەریف کەردەن
جەمینت نە جام جەم گرەو بەردەن
تۆ هێمای غونچەی باغچەت نەشکەفتەن
ئەڵماس دوڕ دانەی دورجت نەسفتەن
ئەغیار جە باغت بەرێ نەوەردەن
کەس شەهید بۆسەت لەب چێش نەکەردەن
غەیر جە شاماران توڕڕەی شەوبێزت
کەس نیەن پەشتان باڵای نەوخێزت
گەنج سەر بە مۆر دڵ پەسەندەنی
سەرشار بێهۆش شۆخ ڕەندەنی
هەرچەند داناییت دڵ پەسەندیدەن
بەڵێ فێڵ و فەند دنیات نەدیدەن
حەیفەن وێنەی تۆ شاهی نە ئەییام
بە مەکر و زوبان ویش کەرۆ بەدنام
بەی تەور مەعلوومەن خوسرەو لاڵ بەخش
جە سینەت سەودای عەشقش کەردەن جۆش
نەوا بە زوان بدەرۆت بازی
جە ڕای نادانی چەنیش بسازی
سەرف کەرۆ بە مەحز شیرین زوانی
حەڵوای شیرینت بە ڕایەگانی
وەختێ بە موفتی کەفتی بە دەستش
ئاخر بەد مبۆ چەنی تۆ قەسدش
ماچان سێسەد تەن پەرستارشەن
چەند مەحبووب شۆخ نە سەرکارشەن
باڵاشان چون سەرو لەرزان توولەن
زوڵفشان چون لوول لەولاو لوولەن
تۆ جە لای ئەوان کەی خاستەر مبی
بەو تەما مەبەر شیرینتەر مبی
سەڵاح هەر ئێدەن ئەر تۆش زەروورەن
ئەر جە عەشق تۆ دیدەش بێ نوورەن
بە شیربەهای تۆ زوڵفان بۆعەنبەر
ئەرمەن پەڕ کەرۆ جە گەنج و گەوهەر
تا من پێش دەروون تۆ بە حەڵاڵی
ئێدەن ڕاگەی ڕاس ساحێب کەماڵی
وەر نە تا زهوور عەرسەی قیامەت
مکێشی نە ڕای سەخت نەدامەت
شیرین ئێد شنەفت جە بانووی پڕ هۆش
حەرفش چون دانەی گەوهەر کەرد نە گۆش
وات بە هەفت ئەوڕەنگ ڕەوشەن بۆ سەوگەند
عەممەی عەزیزم بانووی دڵپەسەند
ئەو خوسرەو منیۆ نە فەرقم ئەفسەر
ئەر ببەخشۆ پێم شاهیی هەفت کیشوەر
ئەگەر ڕووی زەمین گشت ببەخشۆ پێم
ئەگەر چون قەقنەس ئاهیر بشۆ لێم
من جە ئەمر تۆ نمەشوون وەبەر
مەر بە حەڵاڵێ ببووش وە هەمسەر
مەر پارچەم کەران بە دار پاچێ
بێ کابین بدەون بە خوسرەو ماچێ
بانوو دیش شیرین بەی تەور سەوگەند وەرد
جە وەسوەسە و فکر خاترش جەم کەرد
هۆرێزا بۆسا ئەو زوڵف عەبیرین
ئەو دیدەی قەتارن خاوئاڵووی شیرین
بەڵێ داش ڕوخسەت ئەو چەنی خوسرەو
بە وەخت و بێ وەخت، بە ڕۆ یا بە شەو
بنیشان وەهەم چون کەیان کەی
بنۆشان بە شاد جورعەی جام مەی