nisîḧit kirdin mihîn banu şîrîn ra dir bab xisru kih aw ra bazî nidihd
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
569 Dîtin
neqqaş ey neqiş şox ’enberîn
bey destûr kerd neqiş ey namey şîrîn
banû çun be feř şay wała tebar
yawna be çerx ferq îftîxar
ce ters şîrîn şeydayî perwêz
milerza çun şax sewł serawêz
pey çêş herkesê derûnş paken
necîben bê ’eyb, saḧêb îdareken
xof napakan daym her pêşen
ta zînden cêşan her be endêşen
banû mizana be kar xusrew
be ’eşq şîrîn nezerbazî ew
watiş be şîrîn berguzîdey min
firzend ’ezîz nûr dîdey min
ce qaf ta be qaf behay nazten
şeker şermindey řêzey řazten
çun to ahûyê ne mułk ermen
nyen ne ’ersey xeta ta xuten
bałat bê ’eyben, ḧeq şerîf kerden
cemînit ne cam cem girew berden
to hêmay ẍunçey baẍçet neşkeften
ełmas duř daney duricit nesfiten
eẍyar ce baẍit berê newerden
kes şehîd boset leb çêş nekerden
ẍeyr ce şamaran tuřřey şewbêzit
kes nyen peştan bałay newxêzit
genc ser be mor dił pesendenî
serşar bêhoş şox řendenî
herçend danayît dił pesendîden
bełê fêł û fend dinyat nedîden
ḧeyfen wêney to şahî ne eyyam
be mekir û zuban wîş kero bednam
bey tewr me’lûmen xusrew lał bexiş
ce sînet sewday ’eşqiş kerden coş
newa be zwan biderot bazî
ce řay nadanî çenîş bisazî
serf kero be meḧiz şîrîn zwanî
ḧełway şîrînit be řayeganî
wextê be muftî keftî be destiş
axir bed mibo çenî to qesdiş
maçan sêsed ten peristarşen
çend meḧbûb şox ne serkarşen
bałaşan çun seru lerzan tûlen
zułfişan çun lûl lewlaw lûlen
to ce lay ewan key xaster mibî
bew tema meber şîrînter mibî
sełaḧ her êden er toş zerûren
er ce ’eşq to dîdeş bê nûren
be şîrbehay to zułfan bo’enber
ermen peř kero ce genc û gewher
ta min pêş derûn to be ḧełałî
êden řagey řas saḧêb kemałî
wer ne ta zihûr ’ersey qyamet
mikêşî ne řay sext nedamet
şîrîn êd şineft ce banûy piř hoş
ḧerfiş çun daney gewher kerd ne goş
wat be hefit ewřeng řewşen bo sewgend
’emmey ’ezîzim banûy diłpesend
ew xusrew minyo ne ferqim efser
er bibexşo pêm şahîy hefit kîşwer
eger řûy zemîn gişt bibexşo pêm
eger çun qeqnes ahîr bişo lêm
min ce emir to nimeşûn weber
mer be ḧełałê bibûş we hemser
mer parçem keran be dar paçê
bê kabîn bidewn be xusrew maçê
banû dîş şîrîn bey tewr sewgend werd
ce weswese û fikir xatirş cem kerd
horêza bosa ew zułf ’ebîrîn
ew dîdey qetarin xaw’ałûy şîrîn
bełê daş řuxset ew çenî xusrew
be wext û bê wext, be řo ya be şew
binîşan wehem çun keyan key
binoşan be şad cur’ey cam mey