گفتار در حضرت اقدس که وعده‌گاه دیدنی محبان است
لە کتێبی:
کۆمەڵەی شیعری فەقێ قادری هەمەوەند
بەرهەمی:
فەقێ قادری هەمەوەند (1830-1890)
3 خولەک
413 بینین
هەر وەقت کەردی مەیل دیدەنیی ئەحباب
مەیۆ بە ڕوکووب بوراق بە شیتاب
جە حین ڕوکووب مەڕانی بوراق
پەی ئەوکەس بەی تەور مەبۆ ئیتتفاق
هەردوو پەی مەقسەد بە ئیتتفاقی
جە ئەوسەت ڕاهـ مەبان مولاقی
یەک عالی درەخت واقیعەن نەو جا،
تەختش پەرچەمەن پڕ خەیمە و خەرگا
نەشئەت هەواشەن پڕ عەیش و ئونسەن
ئیسم ئەو مەقام «حضرة القدسعەرەبی»ەن
نە دائیرەی حەوز تەکمیلەن کورسی
هەواش موفەڕڕیح، سەحراش ئەتڵەسی
مەنیشان بە هەم هەردوو بە دڵواز
بەرگ ئەو شەجەر دەنگ مەدۆ چون ساز
بەو شەرت ئەو کەسان جەی دنیای خەراب
نەکەردەبۆ سەمع تەموورەی ڕوباب
ئەگەر یەکێشان کەردەبۆ مەسمووع
پەی ئوخراش هەرگیز نمەبۆ مەمنووع
چون سەدای نەغمەش دەنگ مەدۆ نە گۆش
نە زائیقەی زەوق مەیۆ بە خورۆش
ئەو کەس کەردەبۆ سامیعەی حەرام
نەکەردەن تەوبەی ئیخلاس جە ئەییام
پۆسەن ئیرادەی شاهـ بێ نیاز
نییەن جە سەمعش ئەو نەغمە و ئاواز
تا هەن ئیشتیاق هەردوو بە لوعبەت
مەنیشن نەوجا بە عەیش و ئولفەت
هەردوو ئارەزووی یەک مەکەن سەماع
هەردووشان جە یەک مەکەن «الوداععەرەبی»
مەکەن پەی خانە بە دڵ ئارەزوو
حازرەن بوراق نەوجا پەی هەردوو
هەر یەکێ پەی قەسر وێش مەبۆ ڕەوان
مەکەن ئیستیقبال هەر دوو حۆرییان
هەر یەک بە نەوعێ مەبینۆ خدمەت
دەست جە بان دەست بە عیزز و ئولفەت
جە ڕەنج و ئەلەم، جە عەیب و عیللەت
جوملە بەرییەن خەلقەندەی جەننەت
هەم بوغز و کینە، هەم بوخل و حەسەد
نمەبۆ نە ئەهل جەننەت موئەببەد
هەواش نە ڕەحمەت زات خالیقەن
شەب و ڕۆز ئەو سوبح سادیقەن
پەی پەی نەسیمەی سوبح سەحەری
مەدۆ نە دەماخ عەتر عەنبەری
عالەم ئەبەدی نەوجا موقیمەن
نە عیجز و حەسرەت، نە بەڵا و بیمەن
نە پیری نەوجا دارۆ نیشانە،
نە ئەجەل نە پەی گێرۆ بەهانە
مەمنووعەن نەو جا هەر تەقوا و تاعات
نە نوماز دارۆ نە ڕۆزە و زەکات
مەوجوودەن جە پێش هەر نەوع خوردەنی
نەدارۆ «اصلاًعەرەبی» جوزء ڕیدەنی
ئەتعیمەش بێ دەرد جوملە سەفوەتەن
تەقسیم عورووق قووەی شەهوەتەن
بە غەیر جە عەرەق یەقین کەن تەمام
نەدارۆ مەخرەج ئەکل هەر تەعام
غوسڵ بەعد جەمع نییەن نە جەننەت
ئازادەن هەر کەس نە موزد و میننەت
هەم خواب و غەفڵەت، هەم سەهو و نیسیان
مەرفووعەن جوملە نە ئەهل جینان
فەرق موزەککەر ئێدەن چەنی حوور
نە خەددش یەک خەت سەبز مەبۆ زوهوور
شوعلەی حوسن مەرد نە جەننەت چون شەم
پڕتەو مەبەخشۆ چون شەمس چارەم