شیعری ئامینە ژنی قانع
لە کتێبی:
دەشتی گەرمیان
بەرهەمی:
قانع (1898-1965)
2 خولەک
735 بینین
خوشکی خۆشەویست، زادەی کوردستان
سپاستان ئەکەم پۆلی چاومەستان
لە پاش سپاس و دۆعاخوانیتان
عەرزی ئێحترام مێهرەبانیتان
وەسیەت بێ بۆتان، هەرچی من ئەڵێم
بیگرنە گوێتان، با نەشزانن کێم
کوڕێ بەخێو کەین بە خوێنی جگەر
ئازاری نەبێ بۆ نەوەی بەشەر
بۆ سوودی شەخسی، بۆ مڵکی جیهان
برای وڵاتی نەخاتە زیندان
کۆ نەکاتەوە درهەم و دینار
هەڵنەمژێ خوێنی بێ‌تین و هەژار
ئەگەر تەبیعەت کردی بە میران
هەژار نەخاتە بێگار و فرمان
ئەگەر بۆی ڕێ‌کەوت کردیان بە میر
نەشکێنێ دڵی کۆمەڵی زویر
ئەر تەعین کرا و بوو بە مەعاش‌خۆر
ماڵی هەژاران نەکێشێ بە زۆر
نە ئەفەندی بێ، نە کوێخادێ بێ
نە وەک هێندێ کەس چەتری سەرڕێ بێ
نەڵێ ئامانجم بەرتیل‌خواردنە
لێی ئاشکرا بێ: دنیا مردنە
کوڕێ بەخێو کەین بە خوێنی جگەر
ئازاری نەبێ بۆ نەوەی بەشەر
هیوای شیرینی، هەوڵ و کۆشش بێ
گەر دەوڵەمەن بێ، خاوەن بەخشش بێ
ئەگەر هەژار بێ، بە ئیش و فرمان
خزمەتی گەل کا بە دڵ و بە گیان
ئەگەر کوێخا بوو، نەڵێ من کوێخام
سەرکاری ناودێ و وەکیلی ئاغام
نەکەوێتە سەر ڕەوشتی بۆگەن
خەڵکی دێکەی خۆی نەخاتە ناو بەن
دەوڵەمەن نەبێ و خادمی دینار
خۆی دوور خاتەوە لە برای هەژار
نە پیاوی ئاغا، نە مەعاش‌خۆر بێ
دڵسۆزی گەل بێ، سا بە هەر جۆر بێ
گیانی شیرینی بۆ سوودی هەموان
بەخت کا لە ڕێی چاکیی نیشتمان
ئەوجارە ئەڵێم منیش کوڕدارم
لە ناو بەشانا منیش بەشدارم