ئاڵاکەم
لە کتێبی:
پاشمەرگەی قانع
بەرهەمی:
قانع (1898-1965)
1 خولەک
593 بینین
ئەی ئاڵای بەرزی سێ ڕەنگی جوان
هەر شەکاوە بی تا ئاخرزەمان
تۆ یادگاری سەلاحەددینی
خوا کۆمەکت بێ، چەندە شیرینی!
کوردان بەبێ تۆ چەشنی ئەسیر بوون
لەناو زیندانا بەندی زنجیر بوون
لاوی کوردستان هیممەتی نوان
کە تۆی هەڵکرد و زنجیری شکان
کەریم خانی زەند، بابائەردەڵان
فیداکاری تۆن بە دڵ و بە گیان
سووریت نیشانەی شەهیدانمانە
سەوزیت نیشانەی دەخڵ و دانمانە
سپیت نیشانەی ئاشتیی وڵاتە
ڕۆژت ڕووناکیی ڕێگەی نەجاتە
گەنمت یانێ های کوردە بزانە
نانی خۆت مەنێ دەستی بێگانە
قەڵەمت مانای: تا ڕۆژی مردن
تێکۆشن لە ڕێی زانین و خوێندن
ئیتر هەر بژی ئاڵای کوردستان!
هەر پایەدار بی تا چەرخی دەوران