نامەیەک بۆ شێخ محەمەد
لە کتێبی:
سروەی بەربەیان
بەرهەمی:
قانع (1898-1965)
2 خولەک
668 بینین
ئازیز زویری، ئازیز زویری
دوور بێت جە گیانت، ماچان زویری
جە بازیچەی چەرخ چەپگەرد دڵگیری
گیرۆدەی مەینەت، بەند زنجیری
شنەفتم، دووربا، ئێش چەم داری
(فروفردانە)، دەرد و خەم داری
باز بێوەفا، چەرخ چەپکردار
شانا مۆر نەرد وە سەد قین و قار
ئەو نەوڕەس نەوهاڵ، باغەکەی شادی
ئەو سەروی جۆبار، ڕەوزەی ئازادی
ئەو باز شەش دانگ، تەڕلان تەوار
ئەو قامەت عەرعەر، ئەو خەڵف چنار
ئەو غەزاڵ وەحش، سەرعێل جەیران
ئەو سەیدێ بێخۆف، ڕەوییەی هەردان
ئەو کەبک پڕ خاڵ، قەهقەهەی کۆسار
ئەو گوڵ~دەستەی تەڕ، سەربەرز گوڵزار
چەرخەکەی بەدخوو، نەداش وە ئازیز
سارد کەرۆ مەیلش، چون ساردی پاییز
داش وەحسنەننام، گیرۆدەی خەس بۆ
پاماڵ زەحمەت، جۆش هەرەس بۆ
دەک ڕۆحش هەوای گۆڕ تەنگ کەرۆ
هونەش پەردەی عەیش وەسڵ ڕەنگ کەرۆ
نەکێشۆ پەنجە، نە تۆی یەخەی ناز
نەنیشۆ هەرگز چەنیش وە دڵ واز
ماچ نەکا لە بان وێنەی پەڕەی گوڵ
نەگیرۆ چەنەش مەقسوودات دڵ
با وجوود ئازیز، یاران بێ مەیلەن
هەرکەس مەجنوونە ئەوان هەر لەیلەن
ویەرد بە ئەحواڵ خەرابەی ئادەم
حەزرەت حەوا، داک کول عالەم
چ ئیسرارەش کەرد پەی گەندومخواری
یاوۆ نا ئادەم وە شەرمەساری
یا حەرەم لووت کارش چ تەور بی
چەنی مەسافر، وە جەفا و جەور بی
شیرین ئەرمەن، فەرهاد فەنادەر
پەی قەتڵ خوسرەو، شێرۆ بە یاد کەر
هەر مەگەر ژەن بی سەنعان فریب دا
هارووت و مارووت، حەپس کریان نە چا
هەر مەگەر ژەن بی، بەلعەم وەست نە خەم
ژەن بی وە سەبەب هابیلی ئادەم
باقی وەسسەلام نییەن مەجاڵم
پەرێ دەرد تۆ، پەرێشان حاڵم