nameyek bo şêx miḧemed
From the Book:
Sirwey Berbeyan
By:
Qani (1898-1965)
2 minutes
667 views
azîz zwîrî, azîz zwîrî
dûr bêt ce gyanit, maçan zwîrî
ce bazîçey çerx çepgerd diłgîrî
gîrodey meynet, bend zincîrî
şineftim, dûrba, êş çem darî
(firufirdane), derd û xem darî
baz bêwefa, çerx çepkirdar
şana mor nerd we sed qîn û qar
ew newřes newhał, baẍekey şadî
ew serwî cobar, řewzey azadî
ew baz şeş dang, teřlan tewar
ew qamet ’er’er, ew xełf çinar
ew ẍezał weḧiş, ser’êl ceyran
ew seydê bêxof, řewîyey herdan
ew kebik piř xał, qehqehey kosar
ew guł~destey teř, serberz gułzar
çerxekey bedxû, nedaş we azîz
sard kero meyliş, çun sardî payîz
daş weḧsinennam, gîrodey xes bo
pamał zeḧmet, coş heres bo
dek řoḧiş heway goř teng kero
huneş perdey ’eyş wesił řeng kero
nekêşo pence, ne toy yexey naz
nenîşo hergiz çenîş we dił waz
maç neka le ban wêney peřey guł
negîro çeneş meqsûdat dił
ba wicûd azîz, yaran bê meylen
herkes mecnûne ewan her leylen
wiyerd be eḧwał xerabey adem
ḧezret ḧewa, dak kul ’alem
çi îsrareş kerd pey gendumxiwarî
yawo na adem we şermesarî
ya ḧerem lût karş çi tewr bî
çenî mesafir, we cefa û cewr bî
şîrîn ermen, ferhad fenader
pey qetił xusrew, şêro be yad ker
her meger jen bî sen’an firîb da
harût û marût, ḧepis kiryan ne ça
her meger jen bî, bel’em west ne xem
jen bî we sebeb habîlî adem
baqî wesselam nîyen mecałim
perê derd to, perêşan ḧałim