٥
گاڤا سەفتەر ژ دەری دکەڤە هوندر، جەلادەت و کاموران رادبن پێ، بەر ب وی دەرن و دکەنن، ژ کێفان، ئەو ب دەنگەکێ بلند دکەنن.
- کەکێن من هاتنە، کەکۆ جەلادەت، کاموران هاتنە... سەفتەر دبێژە و ب هەیەجان دەرە رۆیێ برایێن خوە.
بهێلە، ئەز، دیسان، ب ئالیکاریا دەنگێن قەلس و دێمەنێن نەزەلال ئێن رۆژێن بهوری، بێم ئالیکاریا تە... مالەسەف، ژ ژینەکە خورت ب تەنێ دەنگێن قەلس، سیێن نەدیار و بەرگەهێن نەزەلال ل پەی دمینن. تو ژی دزانی، ڤەژین و شخولێ ڤەژاندنێ ب ئالیکاریا ڤان دەنگ، سی و بەرگەهان تێ پێ، لێ نە مینا خوە یا بەرێ. ژین و ڤەژین، بێگومانە، نە مینا هەڤن. لێ د ڤەژینێ دە، هەرتم دەرس و تەجروبە، تاهم و بیهن، تۆڤ و شۆپێن ژینێ هەنە. مەرڤ دکارە ببێژە، ڤەژین سیا ژینێیە کۆ هەرتم دگوهەرە، جارنا درێژ، جارنا کن دبە. پرەکە زراڤ مینا پرا سراتێ د ناڤبەرا ژین و ڤەژینێ دە هەیە. مەرڤ دکارە ژ وێ پرێ رە ژی ببێژە، «پرا خەون و خەیالان.»
چما ئەز، نها، وەها بەحسا تشتێن، ب قەولێ ئەوروپاییان، «ئابستراک» دکم؟ ژ بەر سەفتەر، ژ بەر ب بیر ئانینا برایێ من ئێ بچۆک... سەفتەر، ژیرترین و زیرەکترینێ مە هەموویان... سەروەخترین و دووربینترین، گەرمترین و گەشترینێ مە هەموویان... لێ د ئەینی وەختی دە، بێمرازترین و بێسوودترینێ مە هەموویان... نها، پشتی ئومرەکێ، گاڤا ئەز د سەر پرا خەون و خەیالان رە گاڤ دکم و خوە دگهینم ئالیێ ڤەژاندنێ، ئەو دانێ سبێ یێ مونیخێ مینا گولەکە نووبشکۆڤی تێ بیرا من. هەیە کۆ نە هەموو ئەو دانێ سبێ، لێ تشتنە ژێ، مەسەلا کەنا سەفتەر، مینا گولەکە سۆر ئا بیهنڤەدایی تێن بیرا من. ئەز دبێژم، نە هەموو دانێ سبێ، ژ بەر کۆ ئەو دانێ سبێ پر سار بوو.
من و کاموران، ب ناڤنیشانا دەستێ خوە، د وێ سار و پووکێ دە، ب زەحمەتی، خوە گیهاند مالا کۆ سەفتەر تێ دە دما. لێ ئەو نە ل مالێ بوو. گاڤا خوەدیێ مالێ، پرۆفەسۆرەکێ ناڤسال، فاهم کر کۆ ئەم برایێن سەفتەرن، وی ئەم ئەزماندن هوندر. ژخوە پشتی بیسکەکێ ژی سەفتەر هات. بەلێ، هنگێ کەنا سەفتەر مینا گولێن سۆر ئێن بەخچێ مالا مە یا کزلتۆپراکێ بوو؛ گەش، نووبشکۆڤێ و بۆش.. ب دۆ سەفتەر رە ژێ، برایێ مە یێ دن تەوفیق هات. ئەم چار برا ل وەلاتەکێ غەریب و دوور گهیشتبوون هەڤ.
چار برا د ئۆدا مەزن ئا سەفتەر دە، ل هەمبەر هەڤ رۆنشتنە و ب کێف و حەنەک قالا هەردو دنیایێن کۆ ئەو د ناڤبەرێ دە دەرن و تێن، دنیا رۆژهەلات، ستەمبۆل، وەلاتێ ئۆسمانێ، کادکۆێ، کزلتۆپراک، مالا وان، باڤ و دیا وان، برا و خوشکا وان، مام و مەتێن وان و دنیا رۆژاڤا، مونیخ، خوەندەگەهێن مونیخێ، ژیان و جڤاتا وێ، کەچ و ژنێن وێ، تیاترۆ و سینەمایێن وێ دکن.
- هوون ئێ ئیشەڤ مە ببن کۆ؟ کاموران ژ سەفتەر و تەوفیق دپرسە. ئەز باوەرم، وە دل نینە، د شەڤا مە یا یەکەمین دە، هوون مە ل ڤێ ئۆدێ حەپس بکن؟
- دە هوون ببێژن، ئەم هەرن کۆ، هوون چ دەر دخوازن؟ تیاترۆ، کۆنسەر، سینەما، رەستۆرانت، گازینۆ؟
چ؟ تەوفیق دبێژە.
- کۆنسەر، کاموران دبێژە، ئەم هاتنە مونیخێ کۆ تێ دە دلێ موسیکێ هلداڤێ، مە ببن کۆنسەرەکە موسیکا کلاسیک.
- ئیشەڤ کۆنسەرەکە موسیکا ماهلەر، گوستاڤ ماهلەر هەیە... لێ، وە کنجێن گەرمتر دڤێ، سەفتەر لێ ڤەدگەرینە. هوون ب ڤان کنجێن ل سەر وە ڤە، نکارن هەرن تو دەری. هەوا پر هشکە، دنیا سارە.