٢
جەلادەت، ب کەن، ل فۆتۆگرافا ئومرێ خۆرت، دلێ جوان دنهێرە. ل مالێ، ل متبەخێ، ئەو ل سەر کورسیەکێ رۆنشتیە و ل فۆتۆگرافا شەهریبانێ دنهێرە. مینا هەرکەسێ شەهریبان ژی ل پەی نەمری یێ یە، ئەو ژی دەرە سەر فۆتۆگرافکێشان و خوە ددە بەر کامەرایان دا کۆ کورتەدەمەکە ژیانا خوە بکە نەمر.
- پر خوەش دەرکەتیە، جەلادەت ب کەن دبێژە، ب گۆتنا فرانسزان، تە پر خوەش «پۆزە» دایە.
ل متبەخێ ئەو ب تەنێ نە. ل مالێ ژی. ژ بۆ سەردانا مەتا جەلادەت، مەلەک خانمێ کۆ نەخوەشە، مالبات دەرباسی ئالیێ دن ئێ ستەمبۆلێ بوویە. ئەمین بەگ، ب وەزیفەیێن گرینگ ئێن دەولەتێ، چوویە دەرڤەیی ستەمبۆلێ. کامۆ چوویە مۆدا چایریێ دا کۆ ب هەڤالێن خوە رە گۆگێ بلیزە. ل مالێ ب تەنێ دو دلێن جوان مانە. دو دلێن جوان کۆ ب گەرمی و خورتی هلداڤێن. ژ رۆژان یەکشەمە. جەلادەت ب هێنجەتا دەرسان، شەهریبان ب هێنجەتا پاقژیا مالێ ل مالێ مانە.
- لێ تە چما ئەڤ گولیێن خوە، مینا هەر جارێ، بەر ب ژێر بەرنەدانە؟
جەلادەت ب کەن و ب گەرماهی ژی دپرسە. شەهریبان کۆ ب قاسێ پێنج سالان ژ جەلادەت مەزنترە، لێ ژ ئالیێ بەژن ژ نها ڤە ژی کنترە، ژ ئالیێ پاشڤە، ل کێلەکا وێ راوەستایە و ل وی و فۆتۆگرافێ دنهێرە.
- ما ئەو نە بەر ب ژێرن؟ شەهریبان دبێژە و خوە خوارێ وێنێ دکە.
گاڤا ئەو خوە خواری جەلادەت دکە، گولیێن وێ رۆیێ وی رادمووسن. بیهنەکە تایبەتی، نەرم، گەرم و خوەش ژ شەهریبانێ دفوورە. جەلادەت هەموو بەدەنا زراڤ ئا شەهریبانێ و بیهنا وێ، ب کەل و گەرمی، حس دکە. بێیی کۆ ئەو های ژی هەبە، ئەو هنەکێ دلەرزە و نەفەسەکە کوور دکشینە. گەرماهیەکە بۆش ب سەر وێ دە تێ. ئەو هنەکی دن، بێدەنگ، ل فۆتۆگرافێ دنهێرە.
- ناخێر، گولی نە ل ژێرن، تە ئەو ل پاش ڤەشارتنە. ب یا من، گاڤا تو گولیێن خوە بەر ب ژێر بەرددی، تو هین خوەشکتر دخویی. ئەو ئاوا هین بێتر ل تە تێ.
- تو راست دبێژێ، ناخوە هایا من ژی نەبوویە...
شەهریبان هنەکی دن نێزیکێ ل جەلادەت دکە و د سەرێ رە ل فۆتۆگرافێ دنهێرە. پۆرێ رەش ئێ هنەکری ئێ شەهریبانێ رۆیێ جەلادەت مست ددە. ئەو نها نەرماهیا مەمکێن وێ ژی ل هەردو ئالیێن ملێن خوە حس دکە. هەموو بەدەنا وی گەرم دبە، دلێ وی پهێت هلداڤێ، ئەو پهێت نەفەس دگرە و ددە. گۆتن هەو ژ دەڤێ وێ دەردکەڤن. جەلادەت نزانە چ بکە. ئەو و شەهریبان بیستەکێ وسان دمینن. پاشی، دا کۆ جەلادەت بالا خوە بقولپینە سەر تشتەکی دن، ئەو ژ پەنجەرێ ل داران و پەلێن وان ئێن رەنگین ئێن پایزێ دنهێرە. رەنگێن پەلان تێکەلن. پرانیا وان زەر دکن، هن مۆر، هن ژی سۆرن. پایز د ئەینی وەختی دە پایزا ئومرێ پەلانە ژی. پشتی دەمەکە کورت ئەو ئێ بوەشن، دار ئێ رووت بمینن، دنیا دێ کراسێ خوە بگوهەرینە.
پایزا ئومرێ پەلان و بهارا ئومرێ جەلادەت... ئومر و دلێ جەلادەت هێ نۆ هشیار دبە. بێیی تو گۆتنان، شەهریبان فۆتۆگرافێ ژ دەستێ وی وەردگرە و هنەکی ژی ب دوور دکەڤە. نەرماهیا بەدەن و مەمکان هنەکێ ژی ب دوورن، لێ گەرماهیا بیهنا وان هێ ژی ل دۆرا جەلادەت هلاوەستیە.
- من ئاڤا سەرشۆکێ گەرم کریە، ئەو حازرە. ئەگەر تو بخوازێ کۆ ئەز پشتا تە کیس بکم، هنگێ بانگ بکە...
بەری کۆ شەهریبان ژ متبەخێ دەرکەڤە، ژی رە وەها دبێژە و بێدەنگ دەرە. جەلادەت دەنگ ناکە، کێلیەکێ وسان بێدەنگ روودنە و ل پەلان دنهێرە. چارە نینە، زاگۆنا تابیەتێ وەهایە؛ پشتی دەمەکێ پەل ئێ ژ ژیانێ خاتر بخوازن، بوەشن و وندا بن، هەرن. چارە نینە، ژ زاین و مرن، رابوون و کەتن، خەو و هشیاری، پایز و بهارێ رە چارە نینە. د ڤێ رۆژا پایزێ دە، بەدەنا جەلادەت، ب هەموو خورتی و خۆرتیا خوە، هشیار دبە.
جەلادەت، ب هێدیکا، رادبە، هنەکێ ل دۆرا خوە، ل متبەخێ دنهێرە و دیسان ب هێدیکا، کنجێن خوە ژ خوە دکە، وان داتینە سەر کورسیا کێلەکا خوە و تەڤی کراس و دەرپێ، بەر ب سەرشۆکێ دەرە.
چارە نین بوو؛ بەدەن هشیار دبوو. وەخت، وەختا دیتن، ناسین و کەشفکرنا بەدەنێ بوو. وەخت، وەختا کتەکتێن روهـ و جان، حس و پەژنان بوو. وەخت، وەختا جەننەت و دووژەها ئەڤینێ، ئاگر و گەرماهیا شەهوەتێ، دینی و دلگەرمیا حەزکرنێ و باران و هوونکاهیا کێفێ بوو.
د وان سالان دە، من خوە و بەدەنا خوە، ژ نۆ ڤە، لێ ئیجار ب ئاوایەکێ دن، ناسی. ئەز دڤێ ل خوە موکر وەرم؛ شەهریبانێ، شەهریبانا کۆ ب بەدەن و زمانێ خوە زمانێ بەدەنێ بوو، د ناسین، دیتن و کەشفکرنێ دە، گەلەکێ ئالیکاریا من کر. شەهریبان ستێرکا گەلاوێژێ بوو، رێ نیشانی من ددا. شەهریبان ستێرکا کەروانکوژی بوو، دل و بەدەنا من دچرووساند...
وێ رۆژێ کۆ تو نها قال دکی، د داویا داوین دە، من دەریێ سەرشۆکێ ڤەکر و بانگ شەهریبانێ کر. ئەو هات. من بەدەنا خوە، ب حەز، جۆش و هەیەجانەکە مینا سەرێ چیایێ ئاگریێ بلند، پر بلند، تەسلیمی وێ کر. ئەو ب حەز و حەزکرن، ب قەدر و قیمەت ل من و بەدەنا من خوەدی دەرکەت. دەستێن وێ یێن نەرم، تلی و پێچیێن وێ یێن درێژ، مینا کۆ ئەو نەخشەیەکە نۆ کەشف بکن، ل سەر بەدەنا من گەریان. هنگێ برووسکێن ئەڤینێ د روهـ و جانێ من دە ڤەدان. هنگێ من، ب راستی، بیر ب ئەڤین و ئەڤینداریێ بر، من فاهم کر کۆ حەز و حەزکرن قووەتە، لێ د ئەینی وەختێ دە قەلسییە...
حەتا وێ رۆژێ ژی، ئەز سونەت نەبووبووم. پێشی ئەو برینێن سەرێ من کۆ ژ دایکبوونێ یادیگارێ من بوون، رێ ل سونەتێ گرتبوون. پشێ ژی ئەو برینێن کۆ ژ بۆیوکادایێ یادیگارێ من مابوون. زکێ من قەلشی بوو، سونەت نەدبوو. لێ دۆترا رۆژا سەرشۆکێ، ئەو رۆژا کۆ زەلزەلەیەکە مەزن ب بەدەنا من قەومی، ئەز چووم نەخوەشخانا جەراحپاشایێ و من ل ور زێداهیەکە دن یا بەدەنا خوە ژ سەر خوە دا ئاڤێتن.
من گاڤەکە نۆ بەر ب دنیا مێر و مێرانیێ ئاڤێتبوو...
جەلادەت د ناڤ پشتەمالان دە ژ سەرشۆکێ دەردکەڤە. شەهریبان ل ور دمینە. ئەز ئێ هەرم بنڤم. بلا کەس بانگ نەکە. بلا کامۆ ژی نەیێ ئۆدێ.
جەلادەت ژی رە وەها دبێژە، دەرە متبەخێ، کنجێن خوە وەردگرە و بەر ب ئۆدا خوە دەرە. ئەو دخوازە ب تەنێ بمینە، ل زەلزەلا ئیرۆ بفکرە، ژ نۆ ڤە وێ بقولتینە و بژی. ل ئۆدێ، گاڤا ئەو دکەڤە ناڤ نڤینان، ئەو، ب دەنگ، وەها دفکرە؛ ئەڤین... دیارە، ئەڤین و حەزکرن هونەرە.