xałoy teskîn bexiş diłey piř derdim
Li pirtûka:
Ew Şî’raney Dirawnete Paɫ Mewlewî
Berhema:
Mewlewî (1806-1882)
2 Xulek
974 Dîtin
xałoy teskîn bexiş diłey piř derdim
nesîm miley manîyay serdim
yek řo taw heres dîdem sołş bî
bad henasem gerdelûlş bî
pîran ber we ḧał sêrey mindałî
netîcey kiłpey xałoy zûxałî
ew řo namey êş, şewan nesreftim
yekser wanamo werehen keftim
pey çêş derûnit we coş ama bê
ce namey wełîn pêset famabê:
goya wetaqî tom bê meyl wanan
yaxo tom wedił we diłserd zanan
hey řo mer agat ce dostî nîyen?
řewyey yaranit ce xatir şîyen
çun yarê kûrey derûn coş dero
yad yar wêş we dił bawero
arezûmend bo pey řêzey řaziş
tej nebo pey řaz dostî newaziş
na’îlac meşyo wêş bêdeng nazo
pey teqrîb yek çêw behane sazo
ya mewaço gyan, ya maço zûxaw
çî bikero dos beyo we cewaw?
min famim yekser ne des werdabî
şewq bê saman to lêm ser dabî
arezûm amay namekey to bî
temennam řeşḧey xamekey to bî
pewke we xidmet bê’edebîm kerd
ta namet beyo pey saknîy derd
werne sa łał bûn bêmeylit zanûn
we berd serd bûn, er serdit wanûn
min mî’yar dił heř keftem tonî
min xûy fênkî toy siftem tonî
darekey serken ḧał peşêw min
we badey meynet dîwaw dîw min
řîşem er we meyl to nebestebê
we mergit sed car hajem beste bê