şikist wizîr az rizim ta be ardugah
Li pirtûka:
Komele Şîrî Feqê Qadirî Hemewend
Berhema:
Feqê Qadrî Hemewend (1830-1890)
2 Xulek
731 Dîtin
supay elxennas awerdin hucûm
şikist werd supay wezîr mezłûm
gurîz kerd supay wezîr yeksere
pişt dan be gurgan ’edû çun beře
elxennas ce pêş supay kînexwa
şiksitey wezîr berd pey xeymega
ẍuřřa be leşker wezîr metîn
ce toy xeymega pya bî ce zîn
ta xor ne çeşmey ḧemîm bî ẍurûb
ne ḧerbey kîn bîn şîmal û cenûb
be emir serdar le’în bed xû
daşan ce bořyey î’adey ordû
ew şew terefeyn řaḧet bîn ce kîn
elxennas xuřřem, wezîr dił ḧezîn
wezîr pey sultan ew şew be te’cîl
’erze înşa kerd, siperd be delîl
waqî’at řezim yekser kerd beyan
sîr’et ker ne kar, supa ker řewan
eger nekyanî supa be îmdad
supa û text û mułk yekser şî webad
ce leşker nîsfiş şehîd û kuşten
beqîyey nîsfiş zexmîn û xesten
hem nutiq û beser pehlewan kîn
herdû esîren ce bend le’în
baqî îxtyar be dest şahen
emirş çun qezay mubrem řewahen
temhîr bî namey wezîr dana
sa’î name send, řahî bî ne řa
cew dima wezîr we bê xewf û bîm
perê mecrûḧan te’îyn kerd ḧekîm
pena berd be zat qedîm mutłeq
ce dewrey ordû kêşa yek xendeq
ce pêş xendeq hem kêşan ḧesar
qaym bîn ce pay ḧesar efgar
ce toy qel’ebend sakin bî leşker
ta xurşîd ne burc meşrîq kêşa ser
seḧergeh wezîr danay piř huner
yek merd fehîm tełeb kerd we ber