hewłî kuştinî şazade gułfam lelayen zeřfamewe
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
8 Xulek
394 Dîtin
bişîn beser kar gułfam û zeřfam
her dû efsûn bend şebřeng bê řam
herdû birader ’elqem dêw bîn
petyarey weyşûm piř řeng û po bîn
be ’ezim dîden lwan perê qaf
xeberdar nebîn ce şûr mesaf
weqtê cekoy qaf dêwan piřfen
horêzan aman be’ezim weten
yawan bizanin dîşan cay şûren
telîsmat kax yekser xapûren
çend laşey dêwan ne řûy xak keften
çenî ẍerq hûn be zemîn ciften
arayş çenî hersê birader
let leten be tîẍ mewday piř xeter
îne dîn we çem dêwan bedřeng
dinya ce laşan bî we şewe zeng
xeylê kerdişan fiẍan û zarî
waweylay bê ḧed we bê qerarî
cew dima her dû be xof û tersan
cerawyaran eḧwał mepersan
dêwê ne’ewca kełhût bê namş
cewmekan bê mawa û meqamş
me’lûm kerd lêşan şazadey çîn bê
’aşiq bedyar noş aferîn bê
kax zengułe yekser telîsmat
temam kerd xapûr zenan da necat
meymûne xatûn ne ça ber’awerd
ew murexes kerd noş aferîn berd
dêwan cadû gişt be fena berd
lwa beweten midara nekerd
wextê şineftin dêwan murdar
cew mawa û mesken negirtin qerar
horêzan herdû beşîn û aşûb
lwan be xaney wêraney zeřkûb
dîşan xwaherş kerden sed pare
dêwan gişt temam bîyen aware
yek be yek watin pey çêş bimanîm
mebo ey ḧeqe wêman bistanîm
ademîzadî xof nekerde bo
ama we ey ca û îne kerde bo
ser ce xecałet çun ber’awerîm
amoşoy wiłat eqreba kerîm
mebo cewatey taney qewm û xoyş
řûman bipoşîn be daman wêş
ẍîretî merdî kî daro neser
bistanû qesas mam û birader
dersa’et herdû xêzan wêney bad
webê mudara ta ademîzad
gêłan şar be şar herde we herde
mekan be mekan melan wiyerde
ce qezay teqdîr řezay kirdigar
yawan be xeymey dîbay zeřnîgar
dîşan cwanê mah cemînê
xeften nerûy text çenî şîrînê
zanaşan îne şazadey çînen
ew şîrîn celaş noş aferînen
* zeřfam dar şimşad berd nebałay ser
řû kerd ne canêb şêr diławer
şazade cew dem bêdar bî nexaw
dîş sya dêwê ama we bê taw
çinarê buzurg girtebê wedest
xiroşa wêney heywinan mest
ahêste necay wêş kerd axêz
dest berd pey qebzey şimşêr xûnrêz
wat ey bedgewher bê ḧeyay bê şerim
eto çekesî amay we ḧerem
wat ême ce qaf kerdenim şêtab
bistanum ce to qesas mam û bab
êd wat dar şimşad berd webałay ser
daş nerûy kepuł şêr diławer
şazadey çalak firset neda pêş
dane kemergeş tîẍ hindî kêş
kemergay napak dêw řecîme
be wêney xeyar kerd bedû nîme
gułfam naẍafił zerbey sehminak
da ce şazade uftad nerûy xak
dûbare ama dêw bed’endêş
yek zerbey henî hem bidero lêş
be emir bêçûn bînay kirdigar
şay noş aferîn nexaw bî bêdar
dya şazade sertapa gułgûn
keften neřûy xak ẍerq bîyen ce hûn
yek sya dêwê şimşadê bedest
midran bişano dûbare beqest
şay noş aferîn nam xuda berd
dest da be şimşêr řû ce mel’ûn kerd
da ne ferq dêw zerbey mûşkaf
kerdiş be dû nîm tabekul naf
cew dema şîrîn bedir qeseb poş
derlad şazade bawerdiş be hoş
ce deng ne’rey mel’ûn murdar
temamîy sipa nexaw bîn bêdar
xan miḧemed çenî ḧemîd melaḧ
poşan be qamet esłeḧe û selaḧ
lwan we xeyme herdû bedewan
dîşan şazade keften bê zuban
wawêla û efẍan xêza ce leşker
girtin çwar etraf dilêr serwer
xan miḧemed dewa ne řûy zam awerd
şêr ser’efraz dîde guşad kerd
dîş ke nedewirş şîn û zarîyen
persa xan miḧemed îne çêş bîyen
watiş fîdat bam îtla’im nîyen
to wêt mezanî îne çêş bîyen
şazade temam wiyerdey neberd
îtla’ kerd pêşan girdîn ḧałî kerd
nezanam pey ser kê da neferqim
îste bey destûr nehûnaw ẍerqim
îse cew cadû nedarûm xeber
lwan ne meydan ne daro eser
noş aferîn wat min kerdim helak
bezerb şimşêr hêndî kerdim çak
şazade û sipa kerdin aferîn
cezor bałay şay noş aferîn
ew şew ne ew ca girtişan qerar
ta şu’ley şefeq sub bî aşkar
sub seḧer xurşîd neburc kêşa ser
bêdar bî nexaw dilêr serwer
ferma pêçawe xeyme û xergahan
bar kerdin newca temam sipahan
nekerdin midar negirtin kemîn
ta yawan be xak êqlîmat çîn
name înşa kerd ce eḧwał wêş
welay ’adił şa řewane kerd pêş
watiş mujde bo nûr dîde û dił
ey baboy serheng padşay ’adił
be fetiḧ û nusret be kameranî
ha ama ce kax beto mizganî
telîsmat dêw cadûm xerab kerd
şay noş aferîn perê wêm awerd
name temam kerd ser bemuhirş kerd
pêça da be dest yek qasîd siperd
qasêd swar bî çewmekan wiyerd
řû ne byaban mekan çîn kerd
sipa koç kerden newca wiyerden
menził we nezdîk şar çîn berden
ce dû fersexîy xeyme û barega
xeyme û xyaban kerdişan berpa
qasêd tîzrew midara nekerd
ta qedem we xeyr beşar çîn berd
dîş ke ’adił şa nerûy text zeř
sucde berd we şah merd diławer
derdem ber’awerd namey nîk bext
be edeb berdiş nya ne pay text
’adil nîga kerd wana namey merd
mefhûm bî temam mutalî’eş kerd
ce mezmûn name dił awerd be coş
bê hoş bî newdem, satê bî xamoş
qasêd tełeb kerd persa eḧwałat
temam guzarş yekser bwanat
sî hezar dane cewahêr û zeř
bexşa we qasêd bî ḧed sîm û zeř
ferma buzurgan wezîran şar
temam ḧazir bîn ce lay şehryar
wat ey wezîran danay diłpesend
wacêben bidûm nezir xudawend
eweł me’af kem hefit sał êqlîmat
bendyan ce bend gişt bidom necat
kerdişan řeha bendyan ce bend
bexşan direm gird ceřay xudawend
cařçî cař kêşa we etraf şar
miskîn û geda bê nam û namdar
karsazî kerdin temam ser’efraz
ferda şay ’adił meşo we pêşwaz
bar kerdin tuḧfe û genc û xezane
çenî payendaz tuḧfey şahane
herçê lazim bî ce endaze dûr
qabil be şahan layeq befeẍfûr
be esasey xas zenendey şahî
yekser swar bîn řewan bîn řahî
ta her dû sipa nezdîk hem bî
ce ẍubar û toz řewşenî kem bî
şa ke nîga kerd ferzend dî we çem
ce řûy xwan zîn çun cemşîd cem
serapay bała cewahêr ẍerqiş
tac xusrewî nya ne ferqiş
yeqîn ḧasił kerd ferzend wêşen
nîşaney temkîn şahane pêşen
taze bî çun guł şikuftey seḧer
wat şukirim bezat dehendey dawer
şazade ne řûy sipa bepawe
dya padşa meyo weřawe
derdem be te’cîl midara nekerd
pyade bî ce esp sucdey pêder berd
şa bosa cemał ew ferzend wêş
begyan û be dił can kerd wefdêş
şazadey serwer dił ce endû keyl
merêza we çem esrîn wêney seyl
cedmay zarî şukirane kerdiş
ḧemd xudawend be ca awerdiş
sed hezar tebeq zeřkerdiş nêsar
payendaziş wist ta qesir zeřkar
«daxił bîn we pay eywan şahî
lwan we sertext baregay şahî»
mah zeř’efşan şox diłfiroz
çenî cemîn mah, soz cehansoz
ce ehil ḧerem aman we pêşwaz
berdin beḧerem her sê besed naz
ce dimay çendê şay noş aferîn
ama be guftar bezar şîrîn
řêzna şeker beleb merêza
henaseş bo muşk xuten mebêza
tewazu’ mekerd dem beřazewe
dû dîdey şoxiş meyl we nazewe
gişt ehil ḧerem melawnawe
řaziş seng sext metawnawe
ce dimay çendê şêr piř cemał
heway ’erûsî awerd be xeyał