zemawendkirdnî şazade û banghêştnî paşaw serdaran
Li pirtûka:
Suɫtan Îbrahîm û Noşaferîn
Berhema:
Xanayê Qubadî (1704-1778)
6 Xulek
454 Dîtin
tełeb kerd yaran xan miḧemed we pêş
perê tedarek pey ’erûsîy wêş
wat bexan miḧemed wezîr kamił
bawer be menził be mûdehay dił
elḧemdulîlla be kameranî
ḧasił bî metłeb beşadkamî
ca we’dî wesił û şewq şadîyen
kar xeyr tefreş munasîb nîyen
bişo we xidmet padşay serwer
perê ’erûsî řuxset tełeb ker
şa wat ey wezîr řuxset dam be to
ferma wacêben mubarekiş bo
beresim qanûn şahane destûr
esasey ’erûsî kerdin bezerûr
dû hefte temam şadî nyaşan
şay noş aferîn ’eqid kerdişan
yawan be murad dû yar canî
meşẍûł bîn be’eyş be kameranî
yaşay keremdar ce her zemanê
byawan bekam gişt newcewanê
şahan êqlîm buzurgan yekser
lwan be xidmet salar serwer
gişt nerûy îxlas bedłiguşadî
kerdişan temam mubarek badî
bazhem şazade şêr řûy neberd
bê ḧed cenîşan mêhrebanî kerd
* ferma bedemax şazadey dilêr
we’deşen şadî xan miḧemed we xeyr
xatûney perî şay gîsû kemend
çenî cehansoz şox diłpesend
herdû wêney qurs xurşîd řexşan
kerdin tedarek mah zeř’efşan
arayş kerdin be şadî û demax
menmana ce terḧ tawsan bax
şazade bewêş ẍeman ser’awerd
berdiş ta daxił betoy perde kerd
daxił bîn behem dû temam newres
be meqsûd kam arezûy hewes
yawan be metłeb bemurad dił
çun bułbuł yawan bewêsał guł
yek dû řo be şad ce mabeyn wiyerd
benay kar xeyr perê ḧemîd kerd
ferma xatûne şay şîrîn endaz
bo be meşatey şox dîde baz
kerdiş arayş mah cehansoz
medrewşa ceřeng xurşîd piřsoz
wêney xan miḧemed ewîç be’î’zaz
berdin weperde şay şekerîn řaz
ce dimay çendê ’adił be’însaf
horêza çenî buzurgan qaf
axûn û qazî hem tełeb kerdin
temam we meclîs şahî awerdin.
nîkaḧ xurşîd xatûney nazar
bestişan perê şêr karzar
beřesim qanûn ’eqdişan wana
beřewyey wêşan ’eqdişan wana
be sa’et xoş deqîq wiyerde
şazade we xeyr lwa weperde
sełamê kerdiş we yar mehweş
burqey zeřnîgar hewada ne řûş
xurşîd nazar xał sosenî
beřûy nazewe mekerd tewsenî
wat min fîdat bam tewsenî meker
nazit mekêşû dił xeste meker
nazar merg min sebirim nemenden
pencey zor ’eşq taqetim senden
neřûy text zeř dûbare piřnaz
çem nyan we hem besed ’îzu naz
herdû çenî hem nîştin wedłiwaz
we ’eyş û nîşat şox şekerraz
necam wêsał sêr şerbet werdin
perê îsraḧet meyl xaw kerdin
subiḧ ke řoşin bî şu’a’ lîk xwer
lwan pey ḧecle meymûne û tac zeř
dyan şazade naman we bîrûn
muḧkemen derga besten enderûn
nîştin wepişt der herdû we xemîn
ta sełat zuhir şazadey maçîn
hîç me’lûm nîyen nimebo bêdar
derişkestin ḧoryan nazdar
dyan we otaq dû ḧorî cebîn
dyan wesûret sułtan maçîn
dyan herdûşan bîyen we zûẍał
şazade çînî û şox newnehał
kef kerden dehen ḧełqey cewahêr
koko ko bîyen çun berf bahêr
marê ḧełqedan nerûy řextixiwab
qetranî zengî bêdar bî ji xwab
jiseday paşan horêza we pa
ama perê qesd dû ḧorî leqa
jiters ew mar şoxan dułber
perit bîn we bîrûn webê pa û ser
wezîře û hawar yexe kerdin çak
sedaşan wiyerd ji kurey eflak
mader şazade ḧeremseray şa
aman jew seday şîn û waweyla
bê perwa lwapey dîn ferzend
dyaş napeyda ew mar gezend
wêş wist we řûy ne’iş ferzend nazdar
şirîqan çun ebir wadey newbehar
xeber çî we goş bê çare ’adił
jiser ta we pa wêş nya ne gił
tac wist wezemîn çî we enderûn
zarîş çî we burc çerx nîlî gûn
temamîy şahan girîban çak çak
nîştin temamî beř û «bîl» xak
* kenîz û ẍułam şîn netoy perde
dîşan herdûşan be wêney murde
herçê watin şa nama be guftar
daşan be serda kerdişan hawar
ne ehil ḧerem waweyla xêza
zelzele çun řoy meḧşer sitêza
nezanan îne xwabşan besten
bew tewr mezanan ye maran gesten
ce zayełey şîn nazk endazan
ce seday nałey cergey kenîzan
xelayeq temam hicûm berdişan
xeylê ferawan şîwen kerdişan
watin şazade îmşew neperde
herdû bê hoşen be wêney murde
ełbet ne asîb kar namerden
zehren necger herdû kar kerden
’adił şa xeber ferzend yawa pêş
derdem we te’cîl şî we bałînş
dî ke şazade mat û bê dengen
mewaçî sûret neqiş řûy sengen
ẍewẍa kefit ne şar xelayq cem bî
yekser matemîn pejare û xem bî
sê şazade xurşîd ’ałemgîr
nyan berûy text bezarî û zewîr
şah û buzurgan temamî yekser
aman we xidmet şazadey salar
mewatin sed ḧeyf pey ey cewane
pey ey şazadey şox zemane
xatûney perî şazade lawna
watiş ḧeyf pey to şîr kîne xwa
ḧeyfim pey ew řoy kax suleyman
zelqem û delqem to kerdî bê gyan
ḧeyfim pey ew řoj mułk zengułe
arayşit kuşt ew sya ẍułe
telîsim zengułe gird day we bad
şay noş aferîn hem wêm day necat
ew řoje sîney «mes’ûd» kerdî çak
îste keftenî beřûy text xak
ewend zarî kerd xatûn ferawan
temam buzurgan des kerd begryan
şazade xurşîd wedexme berdiş
nya neřûy text herdû luxt kerdiş
ew ’ebdureḧman çenî nesruła
şîn we bałînş bikerdin dewa
demê nîgay řûy şazade kerdin
gestey marangaz dewa neberdin
ferheng dêw çenî murẍ wefadar
herdû horêzan ta şîn wegułzar
ḧekîman qaf yekser awerdin
nedewr şazade temam cem kerdin
kizey marangaz hîç nebî dyar
ḧekîman derdem aman be guftar
kesê şo welay feyaz ’abêd
ew baxeber ken derleḧze be zûd
bişon we xidmet daman bigêrot
bełke ne ey kar xeber biderot
xatûney xanim horêza we pa
watiş ey ḧekîm wêm meşûn bewca