amdin nufil şah bih şikar û agah şidin az kar micnun û lişkir kişîdin bih cing ’amrî
Li pirtûka:
Leyla û Mecnûn
Berhema:
Xanayê Qubadî (1704-1778)
14 Xulek
1305 Dîtin
xana şikar kerd, xana şikar kerd
yek řo nufił şa ’ezim şikar kerd
qebîleyê ce qewm ’ereb swar kerd
qîtal ẍezał ahûy tatar kerd
yasa da qoşen, sipay bê saman
řem řem weḧiş û teyr mała we daman
ferma quşçyan herkes pey wêşan
kiławe ce ferq şahînan kêşan
çawşan daşan ne tepił bazan
yuzan řahî bîn, bazan perwazan
destey kemandar řicil řast xemda
qews qezaḧ weş řast peyî çemda
huney bałbaz, piř taf pay yûz
ce cûq espan mahî xoş amûz
ce şaxey şahîn, şeyday ahûgîr
ce qajey peř dał, şeqqey şestitîr
mahî herasan ce tîpî ahû
kêşan pey cebel gułbang yahû
nofeł bew kumeyt řay mencułewe
řikab da ne esp şî ne çołewe
yawna we kaw herdey kohsarî
lwa çenî deng zayełey zarî
dîş nyas neberz say qulley kemer
meyo seday şîn çemerî û çemer
dûd şîwenş girten qulley ko
ha wexten keroş be xak ney ko
tawda we kêlan xasey dyarî
mahûr ’ezîm sext naçarî
dîş şexsê nîşten, yektay long lekoł
ne dêwen ne cin ne adem ne ẍol
mûy serş aman bałay ser poşan
teyran pey sehend sayeş mekoşan
naxunş bîyen we qullabey şêr
bê perwan ce qeti’ mewday naxungîr
ne fewq ferqiş çun sehî serwan
laneşan besten qumrî û tezerwan
tekye dan we seng serd syahê
xeyał meberoş gahê we řahê
gah ne şadî û zewq, gah ne girînen
gah xatir peşêw mat û xemînen
gah xendey bê weqit, gah şîn bê şûn
gah çun elf řast, gah çun ḧełqey nûn
gah merdey bêhoş, gah nîmegyanen
gah ne şukir zat zîkir subḧanen
gah eḧya we meyl xeyał yaren
gah melûl derd, ga dił’efgaren
nofeł nîgah kerd we cestey ḧałş
ama we teqrîr, persa eḧwałş
wat ey bendey zat zahîr û batin
herdey bêdî mał byaban weten
peyçêş nîştenî ney xerabey beř
damanit we zûx zaman kerden teř
binçîney hoşt kê kenden ce bin
esiłit amaden ya ce giroy cin
gîrodey tełsim kam řeng řêwî
ce nesił adem, ya cin û dêwî
zarît ne çêşen pey kê taseten
serit sergerdan kam syaseten
zarît çun xezan cergim řêznan
peşêwît perdax şahîm bêznan
zarît pey kê hen, bey tewr giriftar
endam tenit ze’îf zamdar
řast waçe perêm, ne say sengewe
ce daxt tekim dan we mergewe
zarît ne çêşen, pey kê taseten
serit sergerdan kam syaseten
mecnûn dîş mewbet şay fereydûn feř
walîy memalîk ’areban beř
watiş ey necîb netîcey şahan
ferman fermay mułk ḧuşmet penahan
cey werter namim mewanan we qeys
ne çun îse min berg beden leys
şahan kes we min meqabił nebî
hîmmetî ḧatem lêm ḧasił mebî
keyxusrew nebîş çun min saye û sam
sadey saqîyan, dewr bade û cam
newřes ẍułaman, çabuk swaran
nîmçe kenîzan, nask nazdaran
sipay sehmigîn, řezmî û seleḧşoř
tepił ceng kuban, dawa û şeř û şoř
teḧsîl kerde bîm her yek ne cayê
her yekê layeq ser kar şayê
ce sub ta êwar dest ne kar bî
ce bexşay dirhem dane dînar bî
danşim mafewq danşiweran bî
teb’im bała tebi’ suxenweran bî
lał bam pey namş yek leylê namê
xał daney ferheng û ziłf deste damê
bîna kerd ẍaret sermayey hoşim
lung mecnûnî şana we doşim
řeqem best be nam nergisan mest
derwazey nîşat kameranîm best
babom nawerdiş pey min be řeza
baboy ewîş şî be qîn û qeza
baboy min melûḧ, baboy ew mehdî
herdû ’amîrî ce řay bed’ehdî
bê lutif bîn pey min xułasey kelam
îste qewiłş dan we îbin selam
terk şahîm kerd, longim west ne koł
çołim kerd we zêd, zêdim kerd we çoł
îse ham wey çoł, bêdî herdewe
tekyem dan wey seng syay serdewe
ye bar leban xuşk û qaxmen
ye ah řeng best sya zaxmen
ye dûd derûn tewen tawmen
ye berg û boşak, xurd û xawmen
ye zyadî şe’ir ten cey ẍerqimen
ye laney melan fewq ferqimen
ye ce bułendî û long, dest we ’esamen
ye şêwey adem ce tewasamen
ye mułk û mekan maway deyrmen
ye hamřaz řaz weḧiş û teyrmen
ye bar xatir ce xem keylmen
ye wêł wiłat perê leylmen
ne cay xurakat eẍzîyey lezîz
xorakim gya û awî şoreřîz
ẍeyr ce teyr û tûr, weḧiş weḧşî
beşer nepersan ce ḧałim eḧwał
aro to ne şon sipî tetaran
řat ẍełet kerden çun řaw yaran
me’lûmen ce xof xuda metersî
lutifit şamłen eḧwał mepersî
nam to çêşen biferma beyan
dyaren neseb netîcey ’eyan
wat minim nofeł îbin mesaḧîq
weysî ře’îsim pey enî marîq
watiş bizanam ḧalî nijadî
newey emîran, hem ce pakzadî
her selamet bî, dewr be kamit bo
ce şerq ta be ẍerb, berzîy namit bo
nofeł wat ey qeys berg beden çak
sewgendim be zat ferd tenyay tak
cey wer kes ce bext bed îqbał to
nekerden xeber min ce ḧał to
ta min be tewfîq bînay layenam
perêt bawerdam leyl cemîn cam
ḧerfê pêt waçom, er henî řazî
kota ker teqrîr maceray mazî
perê to ’eyben î herde çołe
î ’esa û keşkoł, kełpos ne kołe
horêze çenîm berot we daman
qesem we bargay berzî îmaman
her gah deway zam nesreftit leylen
şahî û mułk û mał neřat tufeylen
mecnûn wat nofeł padşay ’ereb
taser bot şahî, be şadî û tereb
diłdarîm daşan fire kes pîsew to
girdû ne gunbed cagîr nimebo
firekes ne řay min řêḧanî kaşten
ḧerfişan perêm sûdê nedaşten
sitarem daxił burc mirêxen
řesim e’zem û ax û dirêxen
delwen tał’im awêzan bîyen
firîştem ce min gurêzan bîyen
bextim giriftar dêwî řecîmen
meḧbûs ne tełsim bestey qedîmen
seway zat pak, kar kin fîkunErebî
hîç kes nekerden deway derd min
nofeł wat mecnûn behane wesen
sewgendim bew kes bêkesan kesen
ce genc qarûn gencim fizûnen
fewc qoşenim mewc ceyḧûnen
temam neřat to tufeylim kerden
ya mebo merden ya leyl awerden
nîgah ker we kar kerdey emîran
řeḧmisan çonen çenî feqîran
ewweł be mobet be mîhrebanî
we řesim qanûn pey canfişanî
dûhem we qumaş nadrey şaran
layeq we ser kar selîqedaran
suwem we pêşkeş segławî se’dan
waçanî mencûł ciłfay kemîdan
beḧrî keḧêłan, cehînî eřneb
qebałedaran netîcey ’ereb
pansed çenî zên îrsal bo perêş
her espê çenî ciłewdar wêş
naqey lał peşim ceres ne gerden
hezar mekyanom perê bar kerden
çwarem we yaqût ełmas abdar
mirwarî be seng, gewher be xerwar
qewmanş bew tewr ẍenî ban ce zeř
hîçkam nekeran dawî ḧerf şeř
er be genc û mał nebo řazîşan
mebo ser berûn pey serfirazîşan
er ḧeq leyl we to bwîno layeq
înşałła sipam lêş mebo fayeq
mekeroş we pend watey mang û sał
mawerom perêt leyl sosen xał
ẍerez, şay nofeł be mîhrebanî
we hezar efsûn şîrîn zubanî
řazî kerd mecnûn bar mîḧnetkêş
poşak long we pişt berd çenî wêş
yawna be qesir eywan şahî
ferma qeys we ’ezim ḧemam bo řahî
nedîmanî wêm řefêq ban çenîş
nek xeyał beroş we řagey henîş
herwext ber ama ne germayey saf
bipoşan we ber zeřtar û zeřbaf
baweran ne cem’ cergey meynoşan
ta ber şoş ne ser mayey xamoşan
elqise, yaran mecnûn berdişan
daxił we ḧemam şahî kerdişan
beden ce ḧedes kerdişan zahêr
şêwey ademî weneş bî zahêr
şa yekdest xel’et xasey şahane
kyast pey mecnûn ne cibexane
poşa we endam lîbas şahî
we ’ezim ḧizûr nofeł bî řahî
selam da we řesim, qa’îdey qedîm
yaran mecils kerdişan te’zîm
nofeł we qanûn bizurgan pêş
caş da ne canb dest řast wêş
neřay qeys mecils bezim mey sazan
mutrîban sazan řesmî newazan
seday semturan, çeng xoş aheng
řeqis řeqqasan, şeyday şox şeng
kizey mûkeşan nałey neway ney
soz meqamat ’areban tey
xoşwanan sermest badey ’înabî
mewanan meqam řaḧ řeyaḧî
serweran mesrûr dił xałî ce xem
wiyaran be ’eyş ta be subḧidem
seḧer feřaşan daray cehangîr
horpêça tenaf xeymey syaqîr
seday tepił kos şay xawer xêza
sipay sitaran tersa û gurêza
ce mekan wêş neqłû mekan kerd
îradey sefer lay lamekan kerd
san sipay dac bînay ferar kerd
xefîf bî ce sef xendey şefeq zerd
saknan beḧir, xakîyan xak
aferîdegan sun’ tenyay tak
bêdar bîn ce xaw eḧyay ḧefit îqlîm
meşẍûł bîn we fîkir padşay ’elîm
mecnûn bêdar bî ce xaw şîrîn
şukirş kerd be zat rebٌّ ale’almînErebî
şukiranem be ton kan koy kerem
nûr bexiş ḧoran gułbaẍçey îrem
kêt kerden we şa kêt kerd we derwêş
herkes sazyan çenî bext wêş
ẍeyr ce min fêşter ḧałim peşêwen
řoḧim giriftar tełsim dêwen
gah çay babił, gah şehir derd
gah zelîl zam, gah henasey serd
car car cefay derd, taw taw zux zam
dem dem bar ẍem bipêço ne pam
desgay derd û gaz meynet medom lûl
mekêşom ne ḧelq hetîtey meftûl
seway zat pak besîr û bîna
nîgarendey neqiş new taq mîna
aga bin ce gird derd ḧał min
wiyerdey ewqat mah û sał min
hîç eḧyay tomar derdim newanan
mexfîm çun mezmûn melfûfey xanan
her şukiranemen zat layezal
alḧimd lililh ’ilî kil ḧalErebî
elqise, nofeł wanaş debîrê
danay hunermend, nuktepezîrê
watiş ey debîr namey înşaker
îbtida be nam muşkił guşadger
řeqem kerd benam fesaḧet fercam
be nam mehdî ’amîrî encam
we muhir nofeł îbin mesaḧîq
uweysî emîr pey benî marîq
namey xoş mezmûn be cewahîr keyl
bikyane we lay ’areban leyl
binwîs ey ’îzam netîcey ’îzam
esił menseb xas nîkzadey nîknam
ta dinya dinyas dewr be kamit bo
duşminan mecrûḧ zedey zamit bo
ta dinya dinyan her to bimanî
we ’eyş û nişat we kameranî
gułzar ’umirit çun řiştey řezan
dûr bo ce afet ḧadîsey xezan
dimay şerḧ şewq arezûy dîdar
coyay hewałim we gyan xerîdar
mukşûf me’lûm zakîrey ’alî bo
muzmûn namem wenet ḧałî bo
mekşûf zemîr ḧał mezher bo
meşhûd munîr qelb enwer bo
tezkar xatir ’atir ’alî bo
mezmûn namem serkar ḧałî bo
ne perdey ḧîcab kinaçêt benden
maçan zu’Erebî ce şewq aftab senden
ḧorî tel’eten, ’ulya cenaben
qemer îctînab, xurşîd neqaben
bałaş sîm saf, sêwî sawanen
newtoł newxêz yaney bawanen
şêweş kerden bac humeylay perî
bê şewqen ce laş lîqay muşterî
gîsûş sun’êwen ke nezan çêşen
ḧukim ’esay dest mûsewî pêşen
maçan megêło satê be sed lewn
betał kerden sîḧir batîłey fîr’ewn
pêşanîş we cam cemşîd mewanan
cehan nimay dest namî keyanan
ebro û mujanş syay qetreten
keşîdey peřgar ustay qudreten
dîdeş dîdey çerx mał ce muẍaren
bê surme sêwing, bê mey xumaren
ziłfiş lûl werden çun lûl lewlaw
kiłfen çun kiłaf xeyatey xam taw
belqîs meqamen, firîşte xamen
dûhefte kamił bedir temamen
xałş zimřiřud daney tê nişan
ef’a kor mebo ce dîdenşan
asîbiş we qeys namurad yawan
çun řêzey ełmas cergiş şikawan
dest ce text bext eyalet kêşan
ha ce terîqey řagey derwêşan
tenya û bê řefîq mat sergerdan
îne çend sałen wêłen ne herdan
min yek řo be ’ezim seyd şikaran
řam kefit ne koy necd ne pey tetaran
qeysim dî çi qeys dêwaney bedřeng
mûy ser bałapoş, ferş bałay seng
řeḧmim eser kerd, dêwîyan çenêş
penem êzhar kerd derd ḧał wêş
řastî dûdneferq kellem coş awerd
ne cefay mecnûn řux ne hîcran zerd
we sed delalet sed diłnewazî
we hezaran efsûn kerdenim razî
lêm qebûł nekerd ’uzir û behane
çenî wêm awerd be dewłetxane
hergah lutif şah çenîman yar bo
ḧerf xeyr xas her aşkar bo
ḧeyfen şehzade ’alî nijad bo
saḧêb erkan bêx û bunyad bo
perî xał leyl wêł bo ne kawan
qeys ne kawan bo leyl nebawan
îsti’dam êden we îşfaq şa
we ’eyn ełtaf kero temaşa
qeys kero we ’ebid muxlîs derga
wêney ferzendan pêş kero nîga
qufił bestey bend bextiş baz kero
serş ce meynet ser’efraz kero
şertibestey dostîman ce bałay êden
cay umêdenî we tom umêden
cewabim we ’uzir mu’etteł ne bo
şefeq we deycûr mubeddeł ne bo
er nebot selaḧ xulasey kelam
’ezmim we řezmen, baqî weselam
nameş da we peyk sîrîn xeramê
gerden keşan tewr, nesîmî famê
wat be zibanî hem waçe pêşan
neban we ba’îs bedbextîy wêşan
ḧerf xeyr waçan herta metawan
bełke leyl û qeys be hem byawan
wer ne we me’bûd bê zewc û ferzend
bê xurd û bê xab bê misil û peywend
herta ne cay wêm kerdenim axêz
ser mebo we nirx řêzî gełařêz
qasîd ser’egraz peyẍam şah bî
sucdey zemîn berd řewaney řah bî
medara nekerd, yełẍar da we cext
menziłan tey kerd be weqit û bê weqit
yawan bew mekan badîyey bêdî
dîş seḧra poşan surxî û sifîdî
çetir û çadran, xeyme û xergahan
kêşan we qanûn qa’îdey şahan
xeymey ’ezîmê dûren ce yanan
têda bîyen cem’ namî cewanan
be’zê nîştecan, be’zê sef kêşan
’alî nejadê ha ne diłêşan
qasîd ne zanaw û bê selam sef
nameş berawerd nyaş ne řûy kef
mehdî cew qasîd namêş sitana
menşî tełeb kerd seranser wana
mefhûm bê testîr mezmûn name
meclîs bî we ’eşir yum alqyamhErebî
watşan nofeł fikirî xam kerden
behane pey wêş ser’encam kerden
qewmîşan çêşen nofeł çenî qeys
qeys ’amîrî û nofeł benî weys
ełbet be nîrûy sipay wêş nazan
temay leyl kerden î ḧîlesazan
tełeb kerd debîr perî cewabiş
her êd nezanum perî sewabiş