pîremêrd gêřayewe witî: maqsûdaẍa hebû...
pîremêrd gêřayewe witî: maqsûdaẍa hebû le bineřeta ’arebî cibûr bû. nexwêndewar bû, le baxî puregî - ke êsta cêgay makîney elektirîke konekeye - xanûyêkî bû, jinêkî xełkî suleymanî hênabû, xoy pîrêkî zirte bozî tuře bû, hemîşe legeł mindałana şeře cinêwî bû, jinekeş afretêkî be ’îşwe û naz û taze bû. dirawsêyekî fêłbaz û gałteçîyan hebû «’ebolî ewłay şerîf»y naw bû, hemû car meqsûd aẍay tûře ekird bo ewey cinêwî bidatê.
em meqsûd aẍaye pîrêkî newsin û çiłês bû, hemû řojê eçuwe bazař sa herçî bo mał pêwîst buwaye eykiřî û eynardewe, bo xoyşî şitêkî wek henar ya sêwî ekřî, destesřêkî ałî gułdarî ’ecemî hebû, eykirde destesřeke û be řêda ehatew, ta egeyşte małewe, wiçanêkî leser dûkanekey «se’ey xile sê ser» egirt, tozê řay’ebward û ew wexte eçuwewe.
’ebol řojê wîstî ayn û oynêkî fêłbazî legeł bika, çû desesřêkî wek desesřekeyewe û lewê day nawe, wiçan egrê, ewîş çû be qed henarekanî ew şûtî û kûlekey kiřî û kirdîye desesřekeyewe, hat le tenîşt aẍawe danîşt û be dizîyewe desesřekey aẍay hełgirt û desesřekey xoy dana û hełsa řoyî. aẍaş dway mandû ḧesanewe desesiř heł’egrê û eçêtewe bo małewe bang ekate jinekey û ełê: were em henarane bere yekêkyanim bo hełwerêne. jine desesiř ebate jûrewe ke eykatewe kołeye, ełê: aẍa ya xwa bexêr bêytewe ew şûtîyanet bo tirşyat hênawe? emřo ayşê xiley xizmim sirkey bo nardibûm başe eyxeme nawî.
aẍa dehrî ebê dest eka be cinêwdan, ełê: afret şûtî çî! henarim bo xom kiřîwe, to wiřêne be bîzû ekey? axo kêt girtuwe? afret egrê û desesiř dênête berdemî, ebînê řast eka şûtîye, înca heł’estê be tûřeyî şûtî berêtewe bo ser beqał, le řê la edate dûkanî se’e, ’ebûlîş wa be dwayewe bizanê çî beser dê, dîsan da’enîşê ḧekayetî xoy bigêřêtewe, ’ebol eyxiłafênê desesřekî xoy bo da’enê û şûtî xoy heł’egrêtewe!
aẍa be tořeyyewe eçête ser beqał ełê eme musłimanetîye şûtîy kołe edey be min le batî henar? desesiř eda beser singî beqała û ekirêtewe ebînê, henarekanî le nawaye! qaley pîrot lewê ebê ciřtêkî nîw hoqeyî bo ekenê û ewîş be terîqî û şermezarîyewe henar ekatewe naw desesiř û egeřêtewe, ’ebolîş wa be dwayewe.
sa eẍa le dukanî se’e da’enîşê û dananîşê ’ebol eçê şêlim ekřê û eyhênê dîsan eygořê û aẍa eçêtewe małewe, desesiř da’enê jine bang eka ełê: na wecax to sîḧir bazî! emca disesřeke le pêş xom bikerewe. ke eykenewe şêlmî kał der eçê, înca gobend xest ebê, ełê: jineke to cadugerî etwanî minîş bikey be ker û bim firoşî, biřo sê be sê tełaqit kewtibê! desesiř heł’egrê dêtewe dukanî se’e, lewê derdî xoy egêřêtewe, ’ebol lewê be sûkî desesřî le dest wer’egrê û ełê: ba bîbem le řûnakî temaşay bikem, aẍa to xełefawî, kerî xotit lê buwe be řimzun, hełse pêşim kewe ba bitbeme małî xotan lewê desesřeket bikerewe bizane çî tyaye?
eybatewe małewe desesiř ekenewe henare! aẍa şermezarî eygirê, dest we dawênî afret maç eka û aşt ebnewe, eçne lay «şêx babe ’elî» be her corê bê tełaqekey bo pîne eka.