ce damanit des
Li pirtûka:
Hewargey Diɫan
Berhema:
Seyd Tahîr Haşmî (1915-1991)
2 Xulek
684 Dîtin
ce damanit des ...
şerten wer nedem ce damanit des
cey dewr dinya her tom henî û, wes
megêłût nepey, ta axir nefes
kesim her tonî, pey çêşmen kes
yaḧey byawom wasanet desřes
wayr dûrît, ha bîm we qeqnes
wexten ke eřwam ber şo ce qefes
biřes we firyam hanamen hana
hîcranit berden ce min tewana
qesem bew zułfan pexiş û perêşen
dam diłan gîr, bêgane û xwêşen
bew le’il le ban şifay min pêşen
bew ’îşwe û nîga, řîşey gyankêşen
bew xendey piř noş pey min piřnêşen
bew mujgan, neçîr ’aşiq xidêşen
bew qamet qyam qyamet wêşen
bew řeftar pey min daxma û êşen
er baweřdarî meḧbûb dana
hîcranit berden ce min tewana
yaney dił wêran burqey nazten
yeqîn wêranîş we diłwazten
beheşt nimûney yeqey wazten
kewser neş’e bexiş řêzey řazten
tûba bałay terk weş endazten
tesnîm boy nefes diłnewaz ten
firîşte yexsîr dîdey bazten
ḧûryan ḧeyran turkitazten
wey şêwey feř bexiş, we girdîn mana
hîcranit berden ce min tewana
er ey cefakêş, şox diłpeyker
erê ey seyyad, zam tîr xeter
erê ey bêxem xem der xeman ber
qarqîn çûn jar, tebessum şeker
erê ey ahûy mał ce bîdî beř
boy henase weş, zułfan bo ’enber
e ey nexił şox, mayey gyan semer
sayey sam sengîn sewł naz perwer
bew kes ke’î řeng ne řûy to şana
hîcranit berden ce min tewana