heway new payîz ’îrfan engêzen
Li pirtûka:
Hewargey Diɫan
Berhema:
Seyd Tahîr Haşmî (1915-1991)
2 Xulek
714 Dîtin
heway new payîz ’îrfan engêzen
şinoş boy nefes weharan bêzen
er sed new wehar derûn ce hûn keyl
menmano cilwey gona û zułf leyl
demaxiş berzen, îstiẍnaş karen
pergeney piř şor, menził meẍaren
dewr medo ne herd ser dyaranda
ne hajey dûdang wefruwaranda
carcar xeyał xam, temelûl xêzen
xeyr lał bam dûrîş meynet amêzen
lasamey we tawřuwan ta weşew
zîřey kurde mał şew nekerde xew
diłopey yanan, xełk dêkanî
qiřan małat ya ne wêranî
hajey řeşebay cefa we paker
textey sya mał ce bêx ber awer
giranî ałf nabûdî kelak
temamî bar’aş, pêkzî xorak
lafaw û heres wefir serkawan
kuřî serawan, kokoy şetawan
her çend ke se rwext geşt gułzaren
îne gird sifet xasey weharen
bełam new payîz bo ’ebîr nefes
meqbûł û merẍûb ce lay xas û ges
cebîn zerdiş teła nîşanen
tey nîşan ce duřiř le’il řexşanen
kenarey fezay dewirş gułfamen
hewaş çûn heway beheşt aramen
piř û poşteyî û têr û teselî
saq û selîmî û dûr ce keselî
kadan û lode ce ałf keylen
demax małat we keyf û meylen
çał piř ce genim, kenû piř ce ard
çêłgidan peřen wer ce heway sard
werd dû hêşe, şerîf cûtyaran
bezirşan paşa, wer camay waran
mîwehat wafir, xorak firawan
wadey herzanî kul cinsê yawan
menmano ke xełk peneş abaden
ce desřenc wêş temam diłşaden