هەوای نەو پاییز عیرفان ئەنگێزەن
لە کتێبی:
هەوارگەی دڵان
بەرهەمی:
سەید تاهیر هاشمی (1915-1991)
2 خولەک
711 بینین
هەوای نەو پاییز عیرفان ئەنگێزەن
شنۆش بۆی نەفەس وەهاران بێزەن
ئەر سەد نەو وەهار دەروون جە هوون کەیل
مەنمانۆ جلوەی گۆنا و زوڵف لەیل
دەماخش بەرزەن، ئیستغناش کارەن
پەرگەنەی پڕ شۆر، مەنزڵ مەغارەن
دەور مەدۆ نە هەرد سەر دیاراندا
نە هاژەی دوودانگ وەفروواراندا
جارجار خەیاڵ خام، تەمەلوول خێزەن
خەیر لاڵ بام دووریش مەینەت ئامێزەن
لاسامەی وە تاوڕووان تا وەشەو
زیڕەی کوردە ماڵ شەو نەکەردە خەو
دڵۆپەی یانان، خەڵک دێکانی
قڕان ماڵات یا نە وێرانی
هاژەی ڕەشەبای جەفا وە پاکەر
تەختەی سیا ماڵ جە بێخ بەر ئاوەر
گرانی ئاڵف نابوودی کەلاک
تەمامی بارئاش، پێکزی خۆراک
لافاو و هەرەس وەفر سەرکاوان
کوڕی سەراوان، کۆکۆی شەتاوان
هەر چەند کە سە روەخت گەشت گوڵزارەن
ئینە گرد سفەت خاسەی وەهارەن
بەڵام نەو پاییز بۆ عەبیر نەفەس
مەقبووڵ و مەرغووب جە لای خاس و گەس
جەبین زەردش تەڵا نیشانەن
تەی نیشان جە دوڕڕ لەعل ڕەخشانەن
کەنارەی فەزای دەورش گوڵفامەن
هەواش چوون هەوای بەهەشت ئارامەن
پڕ و پۆشتەیی و تێر و تەسەلی
ساق و سەلیمی و دوور جە کەسەلی
کادان و لۆدە جە ئاڵف کەیلەن
دەماخ ماڵات وە کەیف و مەیلەن
چاڵ پڕ جە گەنم، کەنوو پڕ جە ئارد
چێڵگدان پەڕەن وەر جە هەوای سارد
وەرد دوو هێشە، شەریف جووتیاران
بەزرشان پاشا، وەر جامای واران
میوەهات وافر، خۆراک فراوان
وادەی هەرزانی کول جنسێ یاوان
مەنمانۆ کە خەڵک پەنەش ئابادەن
جە دەسڕەنج وێش تەمام دڵشادەن