dûdê axêz kerd
Li pirtûka:
Hewargey Diɫan
Berhema:
Seyd Tahîr Haşmî (1915-1991)
2 Xulek
743 Dîtin
dûdê axêz kerd ...
ce diłey piř şor dûdê axêz kerd
zûxaw, golawan derûn lebřêz kerd
giřey nar hîcir şołey şembêz kerd
’alem girt newer dengubas min
bas cestey şûm bêxoras min
zîłey zayełey zebûnî û xwarîm
qirçey henasey pestî û hejarîm
çun şehab fezay gerdûn şikawan
nimez ke peyçêş welat nyawan
ax to çenî min çend dûřengenî
çendê bêmrwet dił ce sengenî
ce aşuftegî û tarî wibendibazî
şoxî û serkeşî û tundî û nasazî
nimez kam ustad dersiş daden pêt
bêcge ce dîde û hełqey zułf wêt
weytewr kesb řemz yarî kerdenî
des ce meḧbûban dewran berdenî
pey qetił ’aşiq tîr neşestenî
binazûn be to, çi teřdestenî
kes negno ne xem řiştey kemendit
negno ne piřtaf hajey semendit
kes newero zam şimşêr ebrot
ya tîr mujan dîdey qezacot
kes ne noşo jar zehirxendeket
nekêşo azaw ’îşwe řendeket
her dił pey nîşan tîr to xasen
her gyan çenî ’eyş azarit řasen
her ser sizawar berde wazten
her sîne layeq sewday tazten
xulasey kelam şox řendenî
meḧbûb bê’eyb diłpesendenî
şîrîn şişdang xusrew şikonî
hûnî sed ferhad ce dax micronî
sed leylî fiday zerdexendeten
sed qeys mecnûn eramendeten
’ezra leb tejney cur’ey řa ziton
wa miq wamendey ẍemze û naz ton
her kes boyno ew xurde xałan
sermayey şadîş meşo be tałan
kes pey to çûn min xem pêş neweşten
ney dinya, azaw dozex neçeşten