nûr îmanim
Li pirtûka:
Hewargey Diɫan
Berhema:
Seyd Tahîr Haşmî (1915-1991)
2 Xulek
510 Dîtin
nûr îmanim ...
xamoşt kerden nûr îmanim
çepey ayrit werda ne gyanim
weyerd ce fełek qirçey biryanim
namey bednamî wendin ne şanim
tepił řiswayî jendin nebanim
her nam tersan wird zebanim
mewaçî cadar şêx sen’anim
ce pyałey mey ’işqit bîm sermes
kesim pey nemend bêcge ce to kes
ce dîn û mezew wêm horgirtim des
xûgelewanî kerdenim hewes
zunnar negerden, ha naqûsim bes
keftim nasaney kilîsa diłxes
bê diłber nîyen taw û tewanim
mewaçî cadar şêx sen’anim
bîm wesya pûł qełb nařewac
gîrodey azar derd bê’elac
ne zewq û zînet, ne keyf wimezac
megêłûn wêł wêł, wekułkes atac
gahê kiz û kuł, gahê hac û wac
ten byen we pûş, řûm byen we sac
wamendey bednam giroy yaranim
mewaçî cadar şêx sen’anim
sen’an key çûn min sed dax ne dił bî
ya xestey zwîr meynet menził bî?
keftey řenc bê sûd cefa ḧasił bî
key gîrodey herd ẍezałey sił bî?
bełê neřay ḧeq pîr kamił bî
feyz řebbanî perêş naził bî
ew şifaş yawa min bêdermanim
mewaçî cadar şêx sen’anim