meḧşer berpa kerd
Li pirtûka:
Hewargey Diɫan
Berhema:
Seyd Tahîr Haşmî (1915-1991)
2 Xulek
681 Dîtin
meḧşer berpa kerd ...
dîdet we ’îşwe, meḧşer berpa kerd
nîmnîgat benay ceng widawa kerd
ẍemzet we bêxem, ’alem yeẍma kerd
zułifit ta weqîn ’elem bała kerd
musłiman mayl dîn tersa kerd
nazit wêraney derûn awa kerd
řazit deway derd diłey şeyda kerd
erê hey seyyad, hem seyd çalak
çend kes we tîrit xełtanen ne xak?
xedengit wêney xeyał çalaken
dił we tîr to, toy derûn çaken
mer herkes çûn to řend bê baken
ce xuda neters hûnî sefa ken
ce wisawe cestem casanet taken
derûnim piřwey, dîdem nimnaken
er to çenî min derûnit paken
ha, hałim ce derd dûrît hîlaken
weytewr ce tîrit zam zwîrta key
wêney bendîyan ne zencîr ta key?
erê hey ahûy şox herdan gêł
erê hey meḧbûb alem nepey wêł
çûzey sunbuł çerre wêłey řewêł
baş bałades nazaran xêł
kemend ḧeytar mişkîn fam ne pêł
nîgay naz aram, çerx çeman mêł
nazaran jêrdes wêt kerden ser’êł
hûnîy ’aşiqan zuḧak bed kêł
ta key mederî tîr ne cerg min?
me gêrot axir daway merg min
wey ẍemzey hûnřêz dił pê řezawe
wey daway piřwey řomełxezawe
wey naz çeman meyl we qezawe
endam we ḧerbey xeşim ẍezawe
bêbak ne azaw řojcezawe
goş neday we deng lałe û nizawe
cigerday ne sêx dił we sizawe
diłşad we waweyl şîn wi’ezawe
nimez, ta wekey turkitazten
xo alem tesxîr nîgay nazten