نوور ئیمانم
لە کتێبی:
هەوارگەی دڵان
بەرهەمی:
سەید تاهیر هاشمی (1915-1991)
2 خولەک
671 بینین
نوور ئیمانم ...
خامۆشت کەردەن نوور ئیمانم
چەپەی ئایرت وەردا نە گیانم
وەیەرد جە فەڵەک قرچەی بریانم
نامەی بەدنامی وەندن نە شانم
تەپڵ ڕسوایی ژەندن نەبانم
هەر نام تەرسان ورد زەبانم
مەواچی جادار شێخ سەنعانم
جە پیاڵەی مەی عشقت بیم سەرمەس
کەسم پەی نەمەند بێجگە جە تۆ کەس
جە دین و مەزەو وێم هۆرگرتم دەس
خووگەلەوانی کەردەنم هەوەس
زوننار نەگەردەن، ها ناقووسم بەس
کەفتم ناسانەی کلیسا دڵخەس
بێ دڵبەر نییەن تاو و تەوانم
مەواچی جادار شێخ سەنعانم
بیم وەسیا پووڵ قەڵب ناڕەواج
گیرۆدەی ئازار دەرد بێعەلاج
نە زەوق و زینەت، نە کەیف ومەزاج
مەگێڵوون وێڵ وێڵ، وەکوڵکەس ئاتاج
گاهێ کز و کوڵ، گاهێ هاج و واج
تەن بیەن وە پووش، ڕووم بیەن وە ساج
وامەندەی بەدنام گرۆی یارانم
مەواچی جادار شێخ سەنعانم
سەنعان کەی چوون من سەد داخ نە دڵ بی
یا خەستەی زویر مەینەت مەنزڵ بی؟
کەفتەی ڕەنج بێ سوود جەفا حاسڵ بی
کەی گیرۆدەی هەرد غەزاڵەی سڵ بی؟
بەڵێ نەڕای حەق پیر کامڵ بی
فەیز ڕەببانی پەرێش نازڵ بی
ئەو شفاش یاوا من بێدەرمانم
مەواچی جادار شێخ سەنعانم