dermanî zaman derdekey karîm
Li pirtûka:
Dîwanî Mewlewî
Berhema:
Mewlewî (1806-1882)
1 Xulek
3164 Dîtin
dermanî zaman derdekey karîm
hamřazî nałey şewan bêdarîm
řaḧetîy cestey meynet barekem
teskînîy diłey piř ce xarekem
name û hedîyey dosanet yawa
tesdî’it kêşa xeylê mał’awa
řewyey buzurgît weca awerden
ẍerîb newazît we pîşe kerden
bełam bînayîm, min dosî gyanîm
nek çûn bêşertan nanî û zubanîm
diłim we mobet meylî to şaden
ey te’arufe ce lam zyaden
xusûs min ser’î û lêwe û wêłî tom
sewdayî xembar eřagêłî tom
pey to xatirim piř nêş û xaren
pey to zîndegîm çun jarî maren
derûnim daym ce hûn keylî ton
ḧeyatim we şewq heway meylî ton
herga dîm we çem şêwey bałaket
bosam xakî pa û gerdî pałaket
ane gird mayey kameranîmen
ane gird weşî û şadmanîmen
werne îse min hûnî dił werde
qamet sengîbar xeman xem kerde
derûn we mewday dûrît bîyen řêş
hey xakim we ser sewqatim pey çêş