dił dyar nîyen hay nekerdebo
Li pirtûka:
Dîwanî Mewlewî
Berhema:
Mewlewî (1806-1882)
2 Xulek
1477 Dîtin
dił dyar nîyen hay nekerdebo
we xizmet azîz teşrîf berdebo
cew dima min dad we lay kê berûn
na bełed tenya řa çon der kerûn
pay dił siftey derd ser herdan sexten
wêt yawnewe hay nesîm wexten
bikyan perê min dił ew dimawe
wêt, wêt asayî bişo we řawe
misparût we des kizey tasey wêm
we dûy gêcelûl sub henasey wêm
çun yaway we lay bała ’er’er terz
persaş cwaw der we zayełey berz
gilarawiş bê çenî êşî çem
mewat û mewerd xem wekûzey xem
çem ce êşî derd meḧrûmîy pałat
nimenmano ’ekis xeyałî bałat
perdey lêłayî girten dû dîde
xełweten sa bo hey berguzîde
dîdem tawî seyl hûnawan werda
ha aw be derda ama ce serda
dił yend coşî germ xeman dan pêda
semender laneş megêro têda
fîdat bûn azîz cemîn peřey guł
dûrît karê kerd ane çem, êd dił
ḧał çîne tengiter nîyen pêm aman
qedem řence ker aman sed aman
çun cestey xestey meynetan maye
bełkim dîde û dił neşan we zaye
dîde surmey toz pałaket nasen
dił cay derditen mendeyşa xasen