dir byan bisyar awlad budin adim û firqih firqih şidin û fut ḧizirit adim
Li pirtûka:
Rewzetul Sefa
Berhema:
Mîrza Ebdilqadirê Paweyî (1850-1910)
4 Xulek
606 Dîtin
yawa çihil hezar be bê zyad û kem
nebîre û ferzend, ewlad adem
wêş hem hezar sał ’umirş wiyara
çenî ferzendan dara û nedara
ga ce hênd menîşt daym we řaḧet
ga ce ’erebsan mekerd syaḧet
ga tewaf beyt ke’bey mu’ezzem
wiyaran dewran dinyay beynet kem
şukiraney nê’met xuđawend kerdiş
emir û nehî ḧeq we ca awerdiş
yek řo ce teqdîr bînay bê endêş
ze’if û kesalet, azar yawa pêş
adem xerîk mend çenî êş û derd
pey pey mekêşa henasan serd
zana weqit cam bade werdeşen
axir koç řay ’edem kerdeşen
şîsiş tełeb kerd watiş ey ferzend
wey tewren teqdîr emir xuđawend
çûn wêş fermawan bînayî çawan
hezarey ’umirim we axir yawan
me’lûm bo ce lat î dinyay fanî
pey kes nimebo we cawîdanî
to ce dimay min cadar cam ber
meşẍûł we siḧûf zêkir û du’am ber
ḧeq ce nutfey min toş mewcûd kerden
nûr eḧmedîş we to siperden
minîç tom siperd we zat eqdes
řiştey êxtyar wer nedey ce des
cew dima ferma bew diłey piř êş
we dû kes henî ewladan wêş
watiş derûnim ha bî be zuxał
pey nextê mêwey tazey tirş û tał
bişan we beheşt we bê daweran
we îzin me’bûd be’zê baweran
yaran řahî bîn we fermûdey ew
pey mêwey beheşt we dewan dew
dîn cew ser aman dû firîştey pak
dû mela’êkey şox şerefnak
firîştan persan ’ezim kotanen
pey kam mekanê cust û cotanen
’erz kerdin pêşan çigûnegî ḧał
adem pey mêwe, ha bî be zuxał
watşan ce baẍ «cinit almawaErebî»
be’zê mêwey xas řesîdey yawa
ême awerdîm cew çenî wêman
pey adem mêwe îse ha pêman
çenî firîştan ewanîç we hem
ta şîn we ḧizûr cenab adem
qabêz yekdane sêwiş ber awerd
da ne demaẍiş ta adem boş kerd
ten da we qeza, řext řêḧlet best
lêw ḧesretan dûn we dendan gest
cibre’îl mewat: çûn yawan wadet
we zat bê çûn bawer şehadet
ḧewa û benatiş gişt ce pişt ser
mekerdin zarî pey «abu albişirErebî»
adem wat ḧewa bigurêze ce lam
ba ce řesûlan xuđa nezdîk bam
her musîbetê we bende yawan
be wasîtey to pey min bî tawan
ḧewa û benat gişt dûr kewtin ce laş
qabêz meşẍûł bî we qebiz erwaş
kerdiş qebiz řoḧ humayûn ew
řahî bî berdiş we dewan dew
yawnaş we qesir diłguşay şîrîn
we baẍçey fêrdews e’lay ’enberîn
cibre’îl ne’şiş ce xełqî kerd dûr
ẍusiłş kerd we aw guław û kafûr
ḧulley nûr ḧeq kerd we tekfînş
kerdişan nimaz, wana tełqînş
ne’iş mubarek adem berdişan
ce koy serendîb medfûn kerdişan
ḧewa û ewladiş temam seranser
kewtin ne zarî çemerî û çemer
ser çeşmey hûnaw ne çem carî kerd
ewind waweyla û şîn û zarî kerd
řûy wêş we mewday naxûn pare kerd
şadîş ce yaney dił aware kerd
ser ta paş řeng kerd we zûx zaman
yexey ’enber boş diřî ta daman
ta hefit sał temam wêş sya poş kerd
bew hefit sałe ew her adem řoş kerd
hera û cezi’ û fezi’, noḧe û terane
bî be ’adet pey ehil zemane
ḧewayç koçiş kerd pey yorit ’edem
teşrîf berd we lay cenab adem
ḧukim řêsalet ta yawa we şîs
we ’êlim û danş temkîn û tedrîs
nezîrş nebê ne řûy dehir dûn
seđay tewḧîdiş meşî we gerdûn
çûn nûr seyêd ka’ênat pêş bê
cibre’îl daym řehnimay řêş bê
xwelase cew dem dinyay dûn kem kem
awa bî ce tuxim ewlad adem
giro giro bîn ce yek wiyerdin
şaran pey wêşan abedan kerdin
bîn we dû fêrqe cumle xas û ’am
ce xak dîmeşq, şar mêsir û şam
be’zê dîn şîs qebûł mekerdin
be’zê we esnam sucde mewerdin
axir we meylan tak tenyay ferd
ferzendê şîrîn we şîs ’eta kerd
nûr muḧemmed wist ne cebhey ew
çûn mah çwarde medrexşa ce şew
namş enûş bê berguzîdey şîs
daym çenî wêş mekerdiş tedrîs
imûrat gişt ewlad adem
siperd we enûş bê zyad û kem
’umir şerîfiş nosed sał zyad
wiyerd ce dewran dinyay bê binyad
lêbas řêḧlet poşa we qamet
dîn û dîdarş kewt ew qyamet
ne’iş mubarek şîs we dew berdin
ce şam şerîf medfûnş kerdin