dir byan kisb filaḧî û bizir paşîdin ḧizirit adim (’)
Li pirtûka:
Rewzetul Sefa
Berhema:
Mîrza Ebdilqadirê Paweyî (1850-1910)
3 Xulek
654 Dîtin
yek řo subiḧ zûd cenab adem
babay sebuk řoḧ, mubarek qedem
ce dimay ta’et yektay yegane
ber ama we ber ce xełwet xane
wêney fellaḧan meyl sara kerd
bezir û nêłe û gaw, hem gawesin berd
cifit best ew zemîn seḧrayê kała
tuximş paşna û małeş lê mała
be’zê ter zemîn zyad hem kałan
pey kał û mekał ma baqî sałan
hey mekerd we gaw, gaw piřtaf mewerd
we yekcar deştê, dîmadîm mekerd
cey ko hey mewerd we dewan dew
cew ko we nermî gawiş međa hew
we an yek sat wey tewr ciftiş kerd
cay hezar fellaḧ biřî şûm û werd
ḧewa hem daym timaşaş mekerd
her satê seđ car merḧebaş mekerd
ẍerez, mezre’ey ew zêd û mawa
şiş sa’et ḧasił, nextiş pê yawa
adem ce mezrû’ te’cîl kerd pey nan
direwnaş we das, nyaş we xerman
cew demda zemîn xar xatir xem
we awaz berz watiş ya adem
cefay řozgar cergim tawnan
nuxşey bezir tom direng yawnan
gilet nebo lêm cestem piř derden
ewend fellaḧan bazî pêm kerden
hezar hezar kes cey werter sałan
aman wêney to î cage kałan
nemenden quwey haz endamim
zux hor meşana new zuxaw zamim
werne we yek sat we metbû’ to
pêm meyawna gişt mezrû’ to
bełê, çûn dinya xeylê wiyerden
dewran we mexlûq, çend dewirş kerden
min hem ce tefsîr wey tewrim dyen
me’lûmen tefsîr xîlafiş nyen
her ce ’ehd can ta ’esir adem
şest hezar sałen bê zyad û kem
yekser wiyerden dewran fanî
zat bê zewał her to memanî
cew dima adem şay firîşte xo
hołeş best we şad, xermanş kerd ko
ce şinoy şemał wêney bay murad
şen da we ka da, girdiş da we bad
wextê we seren temam kerdiş pak
şukir kerd we zat ferd tenyay tak
ce siř qudret yektay yegane
her yek daneş bî be hezar dane
emcar we şadî kêşaşan we mał
hem çenî ḧewa şay şîrîn cemał
cefay mah û sał kerdin feramoş
meşẍûł bîn we zewq şadî û ’eyş û noş
ta ḧewa ḧemiłş zahêr bî ce no
no mahiş wiyerd yawa we no řo
peyđa bî qabîl qebîḧ qatił
çenî êqlîma cemîn peřey guł
habîl mezłûm meqtûł we qeza
çenî hamşîrey zişt wêş lêwza
ce betin ḧewa û ce pişt adem
her çwar we dû sał peyđa bîn we hem
qabîl habîlş da we gerdewe
pey dinya qapî qetiłş kerdewe
cew dima ta şîs mubarek qedem
xuđa ’etaş kerd yek şew we adem
nûr muḧemmed, řewzey řêzwanîş
medrexşa çûn xwer ne řûy pêşanîş
her kesê yekcar bwînaş we çem
nimeşîş ce yađ ta «yum al’edemErebî»
ḧewa ta bîst sał sałê dû ferzend
mewîna we ḧukim zat xuđawend
çûn ḧukim qedîm danay şekûr bê
yekêşan unas, yekê zikûr bê
unas êmsał we emir cebbar
nêkaḧ mekerdin pey zikûr par
unas parîn bê ẍusse û xeyał
mekerdin ham cifit zikûr êmsał
ẍerez, wey tertîb ewlad adem
zyad bîn temam, cya bîn ce hem