birgiştî bixt xisru û aẍaz fitinh birpa nimudin şîru cihit şîrîn
Li pirtûka:
Şîrîn û Xusrew
Berhema:
Xanayê Qubadî (1704-1778)
4 Xulek
237 Dîtin
ustad ey nexiş şox diłpezîr
sûret ey beḧis bey tewr kerd teḧrîr
xusrew çun ne dewr xaster ne dara
bew tewre wiyerd weneş wiyara
ce meryem ew daşt «şêroye» namê
xerê, xer meẍzê, na puxte û xamê
şûm ezřeq çem, mayey her şeřê
dêw napesend, şûm enqerê
zuşt nabekar, bedîş birûz da
çiraẍ çarey neḧsiş firûz da
ẍezeb xuroş kerd ne çîn çareş
tayn bî ne text sya sitareş
birut bed řeng bedîş birûz kerd
qesd qetił qîn qetiłş firûz berd
şêroy şeř engêz bilûẍiş naşa
xîşimş xuroş kerd, tałeş twasa
awerdiş berat řemił řemmałan
zîc û usturlab nucûm sałan
bedîş bey destûr zuşt zînakar
migêła be tund wêney jar mar
ga ne san sef, ga mibî swar
ga ne şor û şeř, gahê ne şikar
řwê ce teqdîr çerx çepî baz
efsûn gerdûn mekir û ḧîle saz
serkêşa be seyr ne ḧucrey ḧerem
pey seyr û sefay xezane û îrem
kerdiş têda seyr banwan temam
newçe kenîzan bała newnemam
ta be diłberan diłdar dîrîn
ta yawa be seyr be şewq şîrîn
dya be dîdey şîrîn diłber
’eşq ’aşiqîş ne dił kerd eser
tîrê ne mujgan mujey menził mû
piřa ta peř nîşt ne cerg şêro
pêkya be tîr peykan diłber
xatir xeternak cewlaş kerd guzer
şêro şehîd bî be tîr karî
berşî ce ḧerem ce bê qerarî
ga seyr seḧra, ga mişî ne ko
ga wêł û weylan şew mikerd be řo
ga xamoş ne xaw mibî bê qerar
be hîç řeng nebî diłş berqerar
cemînş ce dûd derd diłgiran
zerd û ze’îf bî wêney zaferan
bê xurd û bê xaw, řeng ce hîcran zerd
mikêşa pey pey henasan serd
merduman şêro midîn be matem
bî we pend ’ałem wat wat merdum
midyan be şêro zayf û zerden
deyrî dił azar, derdîn derden
midyan ke şêro xatirş řêşen
kes nimezanaş derdiş ce çêşen
şêro şêt ’eşq xatir xeternak
bêxurd û bê xaw watit bî hîlak
xusrew milawnaş mipersa xeber
mwat ce derdim medarûn xeber
şêroy şeř engêz derûnş řêş bî
pey wêş mizana ke derdiş çêş bî
axir dûd dił mecałş biřî
zuxaw zamet perdey dił diřî
biřyaş taqet û tab û twana
ḧusin û cemałş ce řeng nimana
diřî derd dił ne perdey pêwar
midra ne dewirş ’ałem aşkara
emcar ce naçar zamdar dêrîn
nebî ’îlaciş ce ’eşq şîrîn
çun qeys lêwe be řoj û be şew
wêł bî ne pay qesir telar xusrew
şewan be şîwen ya dos mwanaş
bê xawî ce taf awan sitanaş
bayequş berşî ce şîn û zarîş
biłbił bêzar bî ce bê qerarîş
perwanan ce boy perdaxiş sozan
qeqnes ca qirçey cergiş gurêzan
hudhud hewa best ce şew nałînş
cuẍdan twasan şew ce balînş
’endelîb ce deng dadiş horsa
qumrî ce qûqûy nałeş twasa
îns û cînin û dêw, mel û mûr û mar
bêzar bîn weneş tawyan be tar
murẍ ḧeyatiş ce quřney qefes
kefit ne hîlaket nezi’ nîm nefes
herçend kerd nebî ’îlac derdiş
twasa ce tof henasey serdiş
şêwey şermesar şûm xatir řêş
sefîl mend ce kar sewday sext wêş
şêro şî ne beḧir xanay xeyałan
çêş kerden çenî sernexiş xałan
ser berd ne derûn fikirş kerdewe
qapîy xeyałan pey wêş kerdewe
şeytan şî ne cerg diłey piř telaş
bî be ham kelam ne yagey sełaş
meşq meşweret şêro da be bed
şêwna ’eqiłş, ce řa kerdiş řed
terz fwaran berdiş ne gerdûn
ne řûy sam seng kerdiş sernîgûn
nebî ’îlaciş şûm şeř engêz
xeyał qerar da be qetił perwêz