’aşiq şidin şîru bih şîrîn û aẍaz bina nihadin qitil pidirş
Li pirtûka:
Şîrîn û Xusrew
Berhema:
Xanayê Qubadî (1704-1778)
4 Xulek
393 Dîtin
şêro pey şîrîn dinya kerd be şew
saw xencer da pey qetił xusrew
awerd be xatir pey qetił baboş
zebit kero şahîş hem şîrîn banûş
hîç xaster nyen cey kare kerden
babom xasteren, ya wêm be merden
xusrew ẍełtan kem be zerb xencer
byawwun be wesił şîrîn diłber
hemî ta be key xem xorakim bo
çun cuẍdan daym taka takim bo
xêza û kemer best pey qetił xusrew
kemîn kerd perêş be řoj û be şew
řujan san sef ne dîwanş bî
şewan kizmeçî û pasebanş bî
çend şew kemîn kerd ne qesir û ḧesar
êşkiçî weneş mibî xeberdar
herçend be parêz mişî be endêş
nobedar şew firset neda pêş
ne qesd baboş şewan ta seḧer
ne şîrîn xeyał, ne xusrew xeber
nezanaş keştî şiksitişanen
ejdehay bey tewr ne qesdişanen
yek řo fikirş kerd ebley xeyał xam
kizme û kêşkiçî tełeb kerd temam
aman serhengan nobedar şew
yek yek be şêro sucde berdişan
sefdan ne ḧuzûr şêroy sitemger
dese beste û edeb midran weranwer
midran be xidmet xase ẍułaman
wistin ba werda serşan bi daman
ce sam şêro milerzan be taw
çun wełg dirext ne taqan aw
şêro wat yaran mizandê çêşen
waçûn watey wêm xatirim řêşen
şerḧ ḧał wêm mwaçû pêtan
êwe mizandê be bext wêtan
kerîn mesłeḧet be kar wêman
bełam ber neşo ba ne dilêman
herkes guftarê lêş ḧasił bibo
«اەسلاًErebî» ce destim xełas nimebo
îltîcam êden řoḧim şî weber
dexîlim pêtan derdim dewa ker
bwîndê řengim zahîren lêtan
na ’îlacmen mwaçûn pêtan
werne derd dił er karî nebo
karê bey wêne key carî mibo
eger derd ce dił nebo karger
kê kerd qesd bab, zîna be mader
bełê min zaman cergim mido çił
pêkyay peykan şîrînim bedił
dił benden be dam şîrîn diłber
zedey êş û nêş be mewday xencer
xedeng mujan dîdey sêwengîş
pêkan ne cergim xar xeter řêş
xedeng ebroş ne dil karîger
nêşiş nêş mido çun nêş ejder
herçend ne derûn xeyałim kerden
nedarûn ’îlac be ẍeyr ce merden
pose pêm kerden be merden şadim
mer merden bero fikirş ce yadim
ewend siza kêş syaset barim
koterey zuxał awesûy narim
yeqîn be hîç řeng nimebom dewa
’îlacim nyen ce ane sîwa
er ane nebo derdim nyen çar
labuddim bidem ḧelq wêm be dar
waçûn řast wêm sewday řoj û şew
kerdenim bunyad pey qetił xusre
bişûn parekem cergiş be xencer
byawwun be kam şîrîn diłber
ta îse be şew amanim sed car
kezneçî wenem byen xeberdar
nobey nobedar ḧazir baş şew
nasten byawwun be gyan xusrew
byawwun be yorit yatax perwêz
cergiş hordiřûn be ełmas têz
taciş nîgûn kem, textiş bidew bad
be wesił şîrîn xatir kerûn şad
xeyałê bey tewr ne dił berdenim
cew bone êwe tełeb kerdenim
îltîcam êden ferset biden pêm
byawwun be kam dilaram wêm
xusrew be xencer cergiş pare kem
ce text şahîyî wêş aware kem
tac û tomarş kerû sernîgûn
ẍełtan kerûn berg sertapaş be hûn
ewsa cewdima sewgend bew senem
bitxaney fereng binmano penem
şerit şêro bo bew fikir û xeyał
nebo lazmim zeř û genc û mał
ne text û ne tac, ne dêba û direm
ne dane û gewher, ne genc ḧerem
temam be lamał biderûn pêtan
mibexşûn her yek be qeder wêtan
kerûtan ce genc saḧêb nan û xwan
serdar û sułtan saḧêb supa û san
xezêney xusrew lêtan beş kerûn
wêçim dił be wesił şîrîn weş kerûn
dîn diłberim be to kafyen
zuxaw zaman dił pê şafyen
řazîm min be kesb geda û derwêşî
şerten ce şîrîn bibom dił weşî
watiş be yaran kizneçî temam
ha watim pêtan baqî «ûەالسّelamErebî»