xibir dadin şapur şîrîn ra az kîfît surit
Li pirtûka:
Şîrîn û Xusrew
Berhema:
Xanayê Qubadî (1704-1778)
3 Xulek
603 Dîtin
wat erê salar supay newhałan
bas bała des wenewşe xałan
ye teswîr şay ew hefit kîşweren
newey newşîrawan wala gewherin
keyxusrew mewkîb, tuhemten tewren
eskender ayîn, asûb dewren
tenteney ’ezîm temtûraq ew
nedyen dîdey zaẍ dinyay dûn be xew
ḧusinş şewq ce şewq sîmay xor senden
sed kes çun yosif ken’anş benden
maçî řostemen be terkîb û tewr
namş xusrewen perwêz be řûy dewr
humay xet ne řûy ḧusinş siruşten
řuxsarş çun mah hale nebesten
tuřey kakołş çun zułf ḧûren
gerdenş tilû’ subiḧ bilûren
guł ce şem’ ḧusin ew çun perwanen
sed perî peyker perêş dêwanen
wenet me’lûm bo şîrîn ermen
zułf pexiş, bo mîşk, mudbîrey xuten
be şêwey sûret ew şehryaren
to perêş bey tewr derûnit xaren
er saḧêb sûret be wêş bwînî
bew şikił û şêwe, bew nazenînî
«ni’uz balilhErebî» zułfan bo ’enber
ce sewday şêweş çêş meyot we ser
şîrîn ce te’rîf dił pesendîde
cey duřiř teqrîr temam sencîde
xêzaş ne derûn ce şewq perwêz
ahê çun ahîr ’ersey řestaxêz
ce bazûy piř zor ’eşq bê endêş
aşfiteter bî ew ce zułf wêş
bełê zor ’eşq zerb pencey derd
sed eskender mikero be gerd
berq şołey ’eşq ne řûy ’ersey dewr
bigno be herkes çun tirêşqey hewr
ta zihûr sext řoy «yum alqirarErebî»
mikeroş we pend watey řozgar»
sûd sewday ’eşq daym giryanen
qinyatiş her zûx cerg buryanen
şełła kes sersam sewday ’eşq nebo
minet zedey derd mecnûn meşq
axir tûtî řaz şox leb şeker
şîrîn şem şewq ferxunde exter
watiş ey cwan cîhan gerdîde
xîredmend dewr suxen sencîde
me’lûmen xeylê danşimendenî
aga ce eḧwał sûret bendenî
bo be ’eşq zat bînay kirdigar
çun min derd wêm be to kerd îzhar
ey sûret berden řeng ce řuxsarim
waçe çon mibo ’îlac karim
wextê êd şineft şapûr neqqaş
çun xiřxał zeř kefit ne xakpaş
watiş ey xurşîd xatir pesendim
min ustad neqiş ey sûret bendim
ey nexşe be řeşiḧ xamey şekerřêz
min kêşam be şikił xusrew perwêz
pey çêş, ey xusrew danay mû şikaw
şewê be teqdîr to dyen ne xaw
bew şiko û şewket şehryarîwe
bew feř feřbexiş kamgarîwe
her cew wextewe toş ne xaw dyen
ladê, direngê aramş nyen
sewday ’eşq to karê kerden pêş
bêzaren ce text padşahî wêş
ne zewq cur’ey cam çenîşen
ne meyl şerab şew nişînîşen
bende be ferman ew keyxusrew xû
bey tewr mumtaz bîm ne xak pay tû
řastiş her êden ’erz kerdim temam
«al’emru mînkum, baqî walsّelamErebî»