kişîdin şapur surit xusirira nubit sum
Li pirtûka:
Şîrîn û Xusrew
Berhema:
Xanayê Qubadî (1704-1778)
7 Xulek
611 Dîtin
çun ’ekis turab ew dinyay fertût
řewşen kerd xurşîd çun dane û yaqût
şołey aftab wêney mewday têx
sîlsîley gêsûy şew boy ce bêx
bêdar bîn ce xwab pol meyxiwaran
kemer we pêłan ’enberçe daran
kerdişan be pa seywan guł doz
ne seray boy mîşk deyr perî soz
sara, kam sara? çun řewzey beheşt
zêbnidey nîşat şaystey guł geşt
neẍmey bułbułş ne pay çetir guł
muyerd ne keywan çerx dûr menził
guł baxçey řendiş çun gułzar tûr
ne pay kosaran midrewşa ce dûr
çeşmeş çun çeşmey řeḧîq kewser
mibêza şêwey şîrînî û şeker
nazdaran ce şewq ew zêba meqam
ew nîşatgey xas xecsite fercam
ga saz bizurg şehnaz mijendin
ga tesnîf, ga şi’ir teḧsîn mwendin
meşẍûł bîn be serf badey şîrazî
pey wêşan be şad mikerdin bazî
baz şapûr hem nexiş şîrîn kerd aẍaz
mexfî ce yaran saḧêb ẍemze û naz
awêzanş kerd be tûł neyda
ta pêş bo şîrîn hem şêt û şeyda
naga hem şîrîn şox şîrîn řeng
çerx dû çem çun çem şox poład çeng
dîş hem ew sûret ałay bo ’enber
midrewşa çun şewq sitarey seḧer
horêza be cext hîç nekerd endêş
xeraman çun sewł awerdiş we pêş
ce sewdaş ew şox řiştey îlahî
řeng gułnarîş gêłya be kahî
karê pêş ama şîrîn ermen
wext bî gyanş bêzar bo ce ten
be sed dił ’aşiq giriftarş bî
ne satê aram, ne qerareş bî
mibosaş peywest, mimała ne çem
migrya ce taw çun şerarey şem
bêzar bî ne cam badey gułnarî
be xedeng ’eşq derdiş bî karî
ḧusinş çun şu’ley xurşîd mibêza
çun tecelî tûr nûr lêş mixêza
dersat ce hîcran gêłya ce řeng
ce giftugo kefit, zubanş bî leng
qetre best esrîn be řuxsarişda
be qurs řuxsar piř enwarişda
zumrey xał xasan cemîn mayey nûr
saw kêşan ce lay şîrîn bey destûr
watşan ye kar serserî nyen
mekir cadûy dêw ya perî nyen
nîştin ne dewirş zułf xyatey xawan
enay ew sûret kerdin firawan
watşan nyen ey kare bazî
eger nekermê ye çare sazî
dûr bo şîrîn şeş dang şayî
mikêşo axir ser be řîswayî
ba ca bigêłmê sara û ko peywest
bełge eḧwałê bignoman ce dest
’aqbet çend kes diłsoz ce yaran
girtin guzergay gişt řawyaran
şayed bizanan be bê kudûret
şemmeyê ce şerḧ beya ew sûret
çendê kêşaşan ewan derdiser
nedîşan hîçkes «dyar albişirErebî»
be edeb sucdey pay textiş berdin
be muqeřeban dergaş ’erz kerdin
watin hey şîrîn şox leb şeker
pey keşif ey nexiş dilaray diłber
firawan gêłam sara û ko peywest
herçend ke kerdîm kes nekefit ew dest
sehî ser û qamet lêşan bî memnûn
watiş hey yaran bała zeř sitûn
aro be şadîy ey sûret bende
ey ferxunde nexiş xatir pesende
binoşîm badey erẍewanî řeng
goş derêm we saz neẍmey ’ûd û çeng
be «ḧisb alfirmanErebî» cenab şîrîn
saqyan şox zułf bo ’enberîn
be pêłda tuřey mîşkîn kerdin pexiş
piř kerdin ce mey pyałey piř nexiş
şeker leb her cam mey ke mwerdiş
sucdey ew sûret carê mikerdiş
xem bî qametiş çun nexil newxîz
ce hicûm bad fesił xezan řêz
ahiş wêney dûd nagîrey seqer
řagey kehkişan gerdin get ne wer
baxçey řuxsarş be zerdî kerd meyl
çun wełg wezan řiştey new siweyl
axir cewdima der sa’et şapûr
be delîl ’eqił deryafit kerd ce dûr
zana ke şîrîn biřya qerareş
yawa we serḧed cinûnî karş
hurêza we pa ferxunde şapûr
wêş bew qetaran minmana ce dûr
şîrîn dîş şapûr meḧfûz bî ce zewq
fermaş be yaran qurs qemer şewq
eḧwał ey neqiş ałay zer nîgar
bikerdî te’cîl cew şexis îstîfar
şayed bizano ce laş bo ’eyan
řemzê cey sûret bikero beyan
cem’ê peristar danay piř şi’ûr
pey keşif eḧwał şîn we lay şapûr
perêş seranser şîrînter ce qend
kerdişan teqrîr şerḧ sûret bend
şapûr da cwab ew xas xeyałan
ew cemîn caman wenewşe xałan
wat ye dûřêwen siftenî nyen
weger hen pey kes guftenî nyen
şexsê horêza ey guftey şapûr
’erz kerd be şîrîn cemîn şu’ley nûr
şîrîn êd şineft xêza hem be wêş
gîsû çun ḧełqey kemend kerd be kêş
ce şeqqey xirxał, ziřey pawaneş
ce xişey saçax, şinoy lerzanş
xiroş kefit ne deşt deyr perî soz
ne řewzey gułan weş boy dił firoz
wêney sipî sewł şox xeraman
şî we lay şapûr bê ser û saman
bazû hem ce tar bilûr řexşan
meygûn leb çun le’il daney bedexşan
be şu’ley şehab ah serdewe
nîqab ce řûy qurs řuxsar diřdewe
şem’ řuxsarş sa çun kûrey nûr
satî’ bî çun şewq tecellay koy tûr
çem çun çerx tewr tewaw çare řeş
mujan çun xedeng peř dar terkeş
be şewket şikoy şehryarîş bî
be heybet şêwey cîhandarîş bî
şapûr dîş şîrîn bew řeng be dirust
sucdeş berd derlad wêne bit perest
axir şeker leb be sed ẍemze û naz
watiş be şapûr danay fisûn saz
çiman dyaren nadîrey dewrî
merd danşimend eristû tewrî
’erz kerd bê xîlaf ce kon meqamit
esiłit çi kesin, to çêşen namit
er řast mwaçî danay bê nezîr
bê şa’îbey kîzb, be xuda û be pîr
ce genc û esbab, ce xara û etłes
yend pêt mibexşo ta bwaçî bes
çun ew neyreng saz, samîrî bêze
şineft ey hewał cew şeker řêze
xeylê be edeb şapûr sucdeş berd
medḧiş be zuban fesîḧ eda kerd
watiş ey şabał şahzadey ermen
tûtîy xoş teqrîr, teberzed şiken
ey bende merdê kar azmûden
be pay danayî cîhan peymûden
teyîm kerd cun bad subxêz seḧer
xirabe û me’mûr ’ersey hefit kîşwer
ce her serzemîn ce meh ta mahî
agam be tewfîq zat îlahî
şîrîn êd şineft cew dił pesende
watiş maçî çêş cey sûret bende
watiş hey sułtan eqlîm xûbî
hey xor řexşan burc meḧbûbî
qisey ey sûret dûr û dirazen
wêney zułf to şîrîn endazen
herwextê xergay şay sîmîn ’uzra
xałî bî ce xewf wicûd eẍyar
ełbet ce pay text ferxunde serîr
řemzê cey sûret mikerûn teqrîr
be ḧerf şapûr neqşibend ała
şîrîn şem şewq zeř sitûn bała
’eqid û perwîn tewr yaran ham derd
çun«binat alin’işErebî» peřagnide kerd
dîş meydan xałî ew nadîrey dewr
wistiş ne meydan goy suxen bey tewr