bîm we textey seng deraney leylim

Li pirtûka:
Dîwanî Seyd Yaqoy Mayîdeşt
Berhema:
Seyd Yaqoy Mayîdeşt (1808-1881)
 2 Xulek  569 Dîtin
çiraxim daxî ...
yê řûj le tawişt derûn daxî
wêł wêł megêłam webê demaxî
řam kefit we dyar diłdar yaxî
nigay teḧit û fewq dîwarş kerdim
xêzane derûn henasey serdim
řêzane derûn zûx zamanim
çû co guł bisa ne řûy damanim
dîdem tem awerd leng bî zwanim
ne cay menin bî ne pay lwanim
lewdemda biřya pay pêş û pesim
’înan taqet berşî le desim
satê girîwam we zar zarewe
tek dam we pêwar ew dîwarewe
bełkem siday leyl beyo we goşim
sakin bo diłey zûxawan noşim
her ewsa zanam siday leyl ama
goya her leyl bî we dû ceyl ama
lehcey siday leyl lence û lare bî
tumez kudekiş ne gaware bî
lawelaweş bî pey awextî wêş
şikayet mekerd ne bedbextîy wêş
ga mewat aqam ga mewat bawe
ey ferde mewat we nezim lawe
min umêdwar dergay dawerim
yê newnemamê perêt bawerim
we şikił û şêwey ḧenay perî bo
bałaş çûn dayet ne ’eyb berî bo
saḧêb şerit û şûn şîrîn şêwe bo
çûn dayet şêwey perî pêwe bo
bełam îqbałş çûn dayet nebo
hambext dayet hamsayeş nebo
bełam çûn dayet şûm çare nebo
sersext û bedbext aware nebo
ew mela wenaş welay derdewe
her ta kudekiş xewş berdewe
ta siday layey leylî merdewe
ser nyam we řûy seng serdewe
yawa we gerdûn siday waweylim
bîm we textey seng deraney leylim
herkes guzarş ne kûçey leyl bo
sey yaqo asa her ne waweyl bo