قیبلەم خاوم بۆ
از کتاب:
دیوانی وەلی دێوانە
اثر:
ولی دیوانه (1826-1881)
1 دقیقه
560 مشاهده
قیبلەم خاوم بۆ، قیبلەم خاوم بۆ
ئەگەر وە بێتۆ یەکدەم خاوم بۆ
ڕۆ جەفا و مەینەت شەو ئاراومم بۆ
وە چنگ گیان کێش گلاراوم بۆ
غەیر جە دین تۆ ئەر پەژارەم بۆ
پەژارەی پڕ خەوف ڕای قەنارەم بۆ
ئەر لادێ فکرت بەر کەرۆ نە دڵ
جەرگم لەت لەت بۆ بە مەودای قاتڵ
ئەگەر سیوای تۆ کەسێوەم فەرد بۆ
سەر تا پام پەشتان ئالوودەی دەرد بۆ
ئەر لەحزەی نامت فەرامۆشم بۆ
یا سۆز سەودای تۆ خامۆشم بۆ
زووانم پارەی تێغ ئەڵماس بۆ
دەروونم لەت لەت گشت وە پڵاس بۆ
دیدەم وە دیدەی مەست سێوەنگت
ئەگەر یەک نەفەس نەشنەوون دەنگت
مورغ ئەڕواحم جە تەن بێزارەن
دنیا نە دیدەم زوڵمات و تارەن