esir duřdane
From the Book:
Hewargey Diɫan
By:
Seyyed Taher Hashemi (1915-1991)
2 minutes
528 views
esir duřdane ...
meřêzûn herdem esir duřdane
seyl çem ne terḧ çem dêwane
kerden qeredax derûn wêrane
perê yek ahûy mişkinaf we pêł
ser delîley řem, ne pay herdan gêł
xeyał çûn seyyad, dûdî xem ne dił
řameke rotey, menził ewmenził
axir menziłş, ne serberzêwen
cayê fereḧnak, beheşt terzêwen
boy sefa û sefwet new ułkey safî
pey azar dił mebo be şafî
wenewşey weşbo, řêḧaney peldêz
şew boy şadî bexiş, beřezay newxêz
dîdemes nergis, mey wedes lale
bezim beheşt bêz bê seda û nałe
new serberz şox sołegey şîrîn
guzergay nesîm weşboy ’ebîrîn
çûn řewzey ne’îm yekser byen cem
maçî naz yar medaran we çem
qîblem, yeşêwey zułf û xał ton
nimûney dîde û lêwlał ton
ye boy ketûn koy ’enberbêz ton
xende wi’îşwe û naz, dił’awêz ton
şemał ne baxçey lîmo û digmew qew
ne toy egrîce û pêç kurpew çew
şemîmê we beş herd û berzan kerd
pey giriftî dił derman herzan kerd
werne sołegey berz serherdan
çon hewaş mebo we şifay derdan?
er cilwey zuhrey cemîncam nebo
ya ’etir zułfan ’enber fam nebo
er neş’ey ẍemzey dîde ceyr nebo
qîbley ’aşiqan, gyan weneyr nebo
diłey tîr werdey jar’alûy xeter
çenî řagey çoł megêro newer?