zuhrey zehraşen
From the Book:
Hewargey Diɫan
By:
Seyyed Taher Hashemi (1915-1991)
2 minutes
672 views
zuhrey zehraşen ...
pêşanî wêney zuhrey zehraşen
tebessum ne terḧ loloy lalaşen
leb kan yaqût, qût erwaşen
nuxtey xał ḧebeş zadey mułk çîn
destey zułf kufar bestey dewr dîn
řûmet taze guł, şewnim pê weşten
ḧesretmend perêş her heşt beheşten
ne’ûzubîlla, ẍemzey ẍezewxoş
wistenş ne doş şimşêr ebroş
dîdeş wêney çerx bedxoy çawřeşen
mesten, hûn aşam, tunden, serkeşen
ne, ne, wełedey nesa sił kerden
îman ne derûn ’alman berden
kes nebo bestey destey ḧeytarş
gîrodey azaw, ’îşwey mekarş
murẍ dił ne taw zułf girinciş
peřnedan nedewr xałan zinciş
le banş î’caz mesîḧa sazen
gyan bexşen, şoxen, şekerîn řazen
çun tetar řem, serberzan gêłen
serdar xêłan řend re wêłen
çi weş cew nisar xur negezanda
new fesił payîz wadey xezanda
ce serney mujan řehay dîde mes
tîr medam ne cerg, peyapey peywes
çi weş new serkaw ser herd çołda
new sołegey řem diłan tê moł da
mişt girt çûn seyyad kuşnidey qatił
dane řûy sînem, paça bend dił
ye wiřawey tew zam çend sałen
yam giley werîn yam şifa û lałen?
her çît pê aman ce daxmay derd
amaş muşkiłen, ’umrê bî wiyerd
perê kê desdan ew bext û çare
hor gêło perêş ’umir dubare?
çenî dax û derd wadey subdemda
bî we kizey serd, şî we’demda
ne zûx, ne zamet, ne ئاە û nałe
sa bo bimane û hîç neşot załe