dir byan xwab dîdin aminh ançe rwî dadih
From the Book:
Rewzetul Sefa
By:
Mirza Ebdilqadir Paweyi (1850-1910)
1 minutes
572 views
yek şew amîne danay dyarî
nimez ce xaw bî ya ce bêdarî
yek şexsê ce no we awaz berz
wat we amîne şox ḧûrî terz
neşo ce yadit nam ḧemił wêt
ew şew ce xaw da xo min watim pêt
êsimş muḧemmed çûnke meḧmûden
ḧebîb ḧezret zat mewcûden
wezi’ ḧemił to nezdîken cey dem
zihûr kero şay mubarek qedem
çend du’ay ẍerîb nişan da be ew
pey muḧafzet şeyatîn ce şew
amîne pey pey têkirar mekerdiş
watey xaw şew we řo awerdiş
cey waqê’ate her fikirş mewerd
neqiłş pey zenan qewm qureyş kerd
zenan watşan dû ḧełqey ahen
biker ne gerden be fitway kahen
nek asîb dêw ya saḧrê bo
řemz ecînne, ya say perî bo
amîne ew řo ferden be ferden
çend ḧełqe ahen kerdiş ne gerden
dîş destê ce ẍeyb ama aşkar
ḧełqey asin gişt hewa da be war
watiş lutif ḧeq we çem bidare
asin ce lay wêt niga medare
ḧemił to me’bûd nigedarşen
cin û şeyatîn bew çi karşen?