هەر من خەمبارم
لە کتێبی:
دیوانی وەلی دێوانە
بەرهەمی:
وەلی دێوانە (1826-1881)
2 خولەک
841 بینین
هەر من خەمبارم، هەر من خەمبارم
هەر من خەمینم، هەر من خەمبارم
هەر من «پەروانە»ی «شەم» نادیارم
هەر من سەرگەردان زوڵمات تارم
هەر من ستارەم جە نەحسی پەستەن
هەر من ڕای شەشدەر نەردم دەربەستەن
هەر من چون مریخ خارجەن یانەم
هەر من بەدنامیم پەخشەن جە عاڵەم
هەر من کوشتەی نێش عەقرەب ژارەنان
هەر من ڕیسوای دەور ڕۆزگارەنان
هەر من زیج نەحس کەفتەن وە بەختم
هەر من سزاکێش ئازار سەختم
هەر من «دەلو»ئاسا نە قەعر چاهم
هەر من چون مەجنوونکەس چارە سیاهم
هەر من ئیقباڵم نەردەن نەدارەن
هەر من چون فەرهادکەس کۆکەنیم کارەن
هەر من فریشتەی دەوڵەت خامۆشم
هەر من چون بەهرام نمەد وە دۆشم
هەر من جە ڕای دین بێزاریم وەستەن
هەر من چون سەنعان زوننارم بەستەن
هەر من جە تانەی ڕەقیب ناهاڵ
هەر من شادی و زەوق دنیام بی بەتاڵ
هەر من پەروانەی پەشێو حاڵەنان
هەر من شەو تا ڕۆ شەم خەیاڵەنان
هەر من جەو سەبەب ستارەی چەفتم
هەر من شەم ئائین جە شەم دوور کەفتم
هەر من وە بێ «شەمکەس» گڕاگڕ گڕیام
زەنگ بەد نامی نە عالەم زڕیام
هەر من گشت پەی شەم خاترم ڕێشەن
هەر یاران عیلاج دەرد من چێشەن