هامسەران تارەن
لە کتێبی:
دیوانی وەلی دێوانە
بەرهەمی:
وەلی دێوانە (1826-1881)
1 خولەک
533 بینین
هامسەران تارەن، هامسەران تارەن
ئیمساڵ بیناییم تاریک و تارەن
زەوق زیندگیم چون ژار مارەن
دنیا جە دیدە «وادی القَهارعەرەبی» ەن
گشت عاڵەم نە وەقت فەسڵ نەو وەهار
شاد مەبۆ وە زەوق گوڵان و گوڵزار
من ئیمسال وەهار شادیم ناشاد بێ
پەرێشان جە گشت ڕەنجم وە باد بێ
بوڵبوڵ شاد وە گوڵ من ڕەنجەڕۆ بیم
ڕەنجەڕۆ جە زەوق وەهار نۆ بیم
ئیمساڵ نەووەهار فێشتەر جە ساڵان
ڕازانش ڕەونەق ڕەنگ گوڵاڵان
هەردان، هەڵەتان، ساران، هەواران
خەیمە گوڵپۆشان خاستر نە جاران
من هەر گوڵزار نە دیدەم خار بێ
هەر سەوزە وەنەم وە ژار مار بێ
هەر چەمەن سەودای جوانیم جا کەرۆ
هەر لالە سەودای دەروون داخ کەرۆ
هەر شکۆفەی شەوق شێوەی «شەمکەس» پێش بۆ
دیام وە پێشدا خاترم ڕێش بێ
وەهارێ وەی تەور خۆ جە لام دوور بێ
چەمان نە دیدەم نێش زەنبوور بێ
ئای خۆزگە وە ساڵ نەووەهار پار
هەر ڕۆ سوب سەحەر مەدیام باڵای یار
وەهار ئیمساڵ پەشێو جەستەنان
دوور جە دنیا و دین ئانە خەستەنان