کەلب کۆی یارم
لە کتێبی:
دیوانی وەلی دێوانە
بەرهەمی:
وەلی دێوانە (1826-1881)
2 خولەک
781 بینین
کەلب کۆی یارم، کەلب کۆی یارم
کەلب پاسەبان ئاسانەی یارم
ڕەفێق هامڕاز دۆس دڵدارم
خاک پات وە بان دوو دیدەی تارم
تۆ خۆ نە وێنەی وەفا کێشانی
غەمخوار دڵسۆز گشت دڵڕیشانی
کەلب خانەزای باوان دوسی
دڵگوشای یاران مەجنوونی پۆسی
مەزانۆ قیبلەم هەر وە دەست وێش
پەروەردەت کەردەن تا نەبی دڵڕیش
ئەگەر ئیشەڵڵا قەسد سەرت بۆ
ڕۆ جە ڕۆ سزای بەد بەتەرت بۆ
خەیاڵم نەبی جە وەفاداری
تۆ جە ئاسانەی دۆس دەس هۆرداری
سەبەب چێش بەی تەور هامدەرد دەردم
جە باتی یاران گشت قەوم فەردم
تۆ جە ئاسانەی دۆس دوور کەوتەنی
چۆنەن قەرارت چۆن سرەوتەنی
چۆنەن ئاراگێڵ وێڵ شارانی
هەر موسافری سەر دیارانی
سەگ وات ستەمکێش زەمانەی ناهاڵ
«پەروانە»ی جەمین شۆخ «شەم» جەماڵ
مەر لێڵاوەنی بیناییت کۆرەن
مەر ڕەزای من بێ یا دەست زۆرەن
بابۆی «شەم» هەوای بەغدا شارش بێ
پەی پەس گەلەش من دەرکارش بێ
وە زۆر ئاوەردش هەر وە بێ ڕەزا
تا گورگان گەلەش نەکەران غەزا
بە گۆسفەندان با بۆی دۆستەن
ڕەفێق هامڕاز عەسا و پۆستەن
وەرنە جە کۆ بێ وە بێبەهانە
بگێرۆن جە بەر ئی بیابانە
ئازیز بە فدای کەلب وەفادارت بام
فرستادەی ڕای بەغدا شارت بام