kelb koy yarim
Li pirtûka:
Dîwanî Welî Dêwane
Berhema:
Welî Dêwane (1826-1881)
2 Xulek
564 Dîtin
kelb koy yarim, kelb koy yarim
kelb paseban asaney yarim
řefêq hamřaz dos diłdarim
xak pat we ban dû dîdey tarim
to xo ne wêney wefa kêşanî
ẍemxiwar diłsoz gişt diłřîşanî
kelb xanezay bawan dusî
diłguşay yaran mecnûnî posî
mezano qîblem her we dest wêş
perwerdet kerden ta nebî diłřîş
eger îşełła qesd serit bo
řo ce řo sizay bed beterit bo
xeyałim nebî ce wefadarî
to ce asaney dos des hordarî
sebeb çêş bey tewr hamderd derdim
ce batî yaran gişt qewm ferdim
to ce asaney dos dûr kewtenî
çonen qerarit çon sirewtenî
çonen aragêł wêł şaranî
her musafrî ser dyaranî
seg wat sitemkêş zemaney nahał
«perwane»y cemîn şox «şem» cemał
mer lêławenî bînayît koren
mer řezay min bê ya dest zoren
baboy «şem» heway beẍda şarş bê
pey pes geleş min derkarş bê
we zor awerdiş her we bê řeza
ta gurgan geleş nekeran ẍeza
be gosfendan ba boy dosten
řefêq hamřaz ’esa û posten
werne ce ko bê we bêbehane
bigêron ce ber î byabane
azîz be fiday kelb wefadarit bam
firistadey řay beẍda şarit bam