دڵ وەداخەوە
لە کتێبی:
دیوانی وەلی دێوانە
بەرهەمی:
وەلی دێوانە (1826-1881)
1 خولەک
1193 بینین
دڵ وە داخەوە، دڵ وە داخەوە
ئیمشەو خەریک بی دڵ وە داخەوە
جە داخ ئەو «شەمکەس» شەوچراخەوە
تا ئاما باوێ جە ئێڵاخەوە
بادێ چون نەسیم ڕەوزەی ڕزوانی
قووەت بەخش ڕۆح سەد ساڵ فانی
نەسیمی نەفەس «مەسیح»ئاسا بێ
تەسکین بەخش زام دڵشناسا بێ
هەم شارەزای ڕای شای شەم جەمین بێ
دۆس پەروانان خاتر خەمین بێ
شەمیمێ جە عەتر زوڵف شەم ئەو شەو
دانە ڕووی دەماخ پەروانەی بێ خەو
پەرسام ئەی نەسیم سوبخێز سارا
دەماخ جە بۆی عەتر زوڵف «شەم» دارا
دەوەندەی تێژباڵ سارا سەیرانی
ڕاهنمای ڕەهبەر ڕاگەی حەیرانی
یە چۆنت زانا من ئیمشەو مات بێم
«پەروانە»ی پەشێو حەبس زوڵمات بیم
کێ شەمیم عەتر «شەم» نمانا پێت؟
ئەی بۆ ئاوەردی نەسیم کێدا پێت؟
وات: ئەی پەروانەی پەڕ سوختەی مەلال
تەن خەستەی ئەییام خوڕڕەمی ویساڵ
منیچ وێنەی تۆ مەعتووف «شەم» بیم
جە بۆی عەتر شەم دەروون پڕ غەم بیم