سەرگەرمی
لە کتێبی:
گوڵاڵەی مەریوان
بەرهەمی:
قانع (1898-1965)
1 خولەک
519 بینین
لە پێش چاوم هەموو عالەم بە چەشنی پەڕەکایێکە
سەرم گەرمە لە مەستیدا چ دەربەستی کڵاویێکە!
هەموو مڵکی بەڵا و میحنەت بە تەنیا ملک و تاپۆمە
کەسێ وا بێ لە ناو شارا چ دەربەستی سەرایێکە؟!
بە غەیرەز خەم کە خواردنمە نەهار و شام و بەرقلیان
لە ئەنعامی خوا حیسسەی ئەمن تەنیا نیگایێکە
لە ئاسمانا بەلایێ بێ لە پێشا دێتە مالی من
بەڵای غەیبی لەگەڵ مندا عەجایەب ئاشنایێکە
بە چەن زەحمەت یەکێ هاودەم ئەبینم تێگەیشتوو بێ
کە وەختێ دێتە گفتوگۆ لە بەختم نێرەگایێکە
ئەوەندە یاس و بێزارم لە عالەم چۆلییە جێگەم
سەفی نەگبەت لە چوار دەورم بە عەینی وەک سوپایێکە
دەخیلت بم لە دەس میحنەت فیرارت قەت نەبێ هەرگیز
لە بۆ دەفعی خەم و غوسسە بەڵا پشت و پەنایێکە
ئەیا ملهوڕ بە مەهتووکی مەفکرە سەرکزی بێدەست
کە چون دەرمانی چەن دەرد و برینی زل گیایێکە
لە دوورۆ پێم ئەلێن «قانعناسناوی ئەدەبی» پیاوێکی ملئەستوورە
بە دیقەت بێن تەماشا کەن کە هەر فرمێسک و ئاهێکە