ژنی نابینا
لە کتێبی:
باخچەی کوردستان
بەرهەمی:
قانع (1898-1965)
1 خولەک
688 بینین
کچێک نابینا بێبەش لە چاوان
کەوتە سەر خەیاڵ دەرچێ لە باوان
شووی کرد بە پیاوێ بێ دەستی هەژار
کاتێ کەوتنە یەک لە کاتی بەهار
بۆ بەهارێ تر ژن زگی پڕ بوو
بۆ باری زایین کەوتە هاتوچوو
کاتێ زا کوڕێک هەر وەک بەرخی نێر
سپی و خەرپۆڵە وەک قاشی پەنێر
کوڕی بەخێو کرد بە دەس تێ کوتان
بەو بێ چاوییە کوڕی پێ گەیانن
ئەیوت باوانم هێزی دڵەکەم
لەباخی ژینا تاقە گوڵەکەم
خەم ئەومە نییە کە من بێ چاوم
لە دنیای ڕوونا تەواو داماوم
من چاوم ناوێ سەیری دنیا کەم
سەیری کۆمەڵی خزم و برا کەم
یا خۆ تەماشای مێگەل و ماڵات
یا خۆ سەیرانی کوێستان و باغات
بۆیە وا دائم زار و زەبوونم
ئەگاتە فەڵەک قرچەی دەروونم
نازانم ڕۆڵە پارچەی بلووری
ڕەشی یا سەوزی، سپی یا سووری؟
ئاخ تەنیا تاوێک چاوم ببوایێ
سەر تا پای باڵای تۆم پێ بدیایێ
پاش ئەوە مردن لەلام زۆر خۆش بوو
چوون لە گۆریشدا هەر تۆم لە هۆش بوو