کەری بانگ کراو بۆ سەر شایی و زەماوەن
لە کتێبی:
باخچەی کوردستان
بەرهەمی:
قانع (1898-1965)
1 خولەک
653 بینین
جارێ کەرێکیان بانگ کرد بۆ شادی
قاقا پێکەنی کەر بە ئازادی
کلکی بەرزۆ کرد لوتی هەڵبڕی
بە دڵێکی خۆش جار جار ئەزەڕی
وتیان تۆ بۆچی وا پێ ئەکەنی؟
خۆ بانگ کراوی سەر زەماوەنی
وتی من بۆیە وا پێ ئەکەنم
نە دەهۆڵ کوتم نە شمشاڵ ژەنم
نە سەرچۆپی کێش نەدوایی گیرم
لەبەر بار کێشان زیز و زویرم
نە هەڵپەڕکێکەم وەک هەڵپەڕینە
نە ئاوازەکەم جوان و شیرینە
بەوا مەنواڕە کز و کەساسم
من وەک خەڵقی نیم خۆم چاک ئەناسم
ئەزانم بۆیە من بانگ کراوم
حەماڵی دار و بەر میلە ئاوم
چەن خۆشە گشت کەس جێی خۆی بزانێ
بەقەد جەوهەری شانی خۆی دانێ
نە چۆلەکە بێ و وەک باز بێتە ڕاو
بەسەرە خەری خۆی خاتە ناو داو