خەڵوەتخانە
لە کتێبی:
گوڵاڵەی مەریوان
بەرهەمی:
قانع (1898-1965)
1 خولەک
845 بینین
لە خەڵوەتخانەدا هەرگیز خەیاڵی دڵڕوبا ناکەم
بە ڕوتبەی خۆم کە فەردی مێحنەتم کەس ئاشنا ناکەم
ڕسوومی عیشق نازانی چ هەرزە و ڕەندە پەروانە
لە دوورۆ ڕۆح ئەکەم پێشکەش لە مەجلیس خودنما ناکەم
بە فکری هیچ و پووچم وام تەما بوو دڵ بپارێزم
لەچاوی تۆم کەوێ دڵبەر خەیاڵی بێ بەقا ناکەم
هەتا جامەی کەفەن نەبڕی کەوای عیززەت لەبەر ناکەی
ئەگەر چی ڕەسمی ئەییامە، کراسی بێ کەوا ناکەم
هەتا دەستی ئەجەل کۆمەک بە کارم بێ لە دەستی خۆم
لەبۆ دەفعی بەڵا و مێحنەت لە کۆمەک مەرحەبا ناکەم
چ فەرقێکی نییە لای من گەدایی یاخۆ پاشایی
کە هەردوو هەر ئەمانەت بێ خەیاڵی تەختی شا ناکەم
چ خۆشە هەڵترووشکانێ لە گۆشەی شاری خامۆشان
کەوابوو ئارەزووی ژیینی جیهانی بێ وەفا ناکەم
خەیاڵی حۆڕی وا شاری دڵی یەکبارە داگرتم
وەکوو بوڵبوڵ منەتباری گوڵ و سروەی سەبا ناکەم
بە ڕەحمەت بێ کە ئوستادم شەوێ بۆ تەربیەم فەرمووی
ئەگەر من قانعناسناوی ئەدەبیم ناو بێ چ بێ ئەمری خودا ناکەم