چۆن نەگریم؟

لە کتێبی:
چوارباخی پێنجوێن
بەرهەمی:
قانع (1898-1965)
 1 خولەک  690 بینین
کوردە چۆن نەگریم هەمیشە بۆ کزی و داماوی تۆ
چۆن قوڕی عالەم بەسەر خۆدا نەکەم بۆ ناوی تۆ
ڕەنگی زەردی جەرگی تۆیە من ئەسووتێنێ تەواو
شێعری من دەرمانی دەردە بۆ دڵەی زاماری تۆ
خوێنی تۆ بە شەربەتی ڕۆژی جلووسی ئەجنەبی
سەیری دوژمن کە لە شار و کووچە و بازاڕی تۆ
سەوزە گیای کارێزی پاشا مێشکی باپیری منە
ئێستە وا فەڕشە لەژێر پێی دوژمنی خونخواری تۆ
ڕۆحی بابانە لە گرد و مەقبەرەی «سەیوان» ئەڵێت
«ڕۆڵەکانم کێیە ئەو خەیمە لە ژووری شاری تۆ؟»
لاوی کوردم مردنت زۆر چاترە تا ژینی وا
ئەجنەبی بێتۆ لە گۆیژە بێبە فەرمانداری تۆ
خوێنی هاوخوێنت ئەڕێژێ نۆکەری ئەگرێتە دەس
هەی سەگم بەردایە زێڕ و لیرە و دیناری تۆ
یادگاری هۆزی مادە داوەشێیت بۆ مامەڵەت
لاپەڕەی مێژوو ئەنووسێ لەعنەتی ڕەفتاری تۆ
قانعاناسناوی ئەدەبی گوفتاری تۆ شیرینە یا شەکر و نەبات؟
کەتنی ناحەق بۆ بکەم شیرینترە گوفتاری تۆ