قسەی قانع لەگەڵ قەڵەمەکەی
لە کتێبی:
چوارباخی پێنجوێن
بەرهەمی:
قانع (1898-1965)
2 خولەک
533 بینین
قەڵەم من و تۆ و ژیان مەزڵوومین
هەر سێ وێنەی یەک بەند و مەحکوومین
من مەحکوومی چەرخ، تۆ مەحکوومی من
ژیان گیرۆدەی دوو سێ دڵ دوژمن
هەر سێ باخەوان باخی بێ بەرین
هەر سێ مەلەوان گێژی خەتەرین
قەڵەم لەم بەینا لە نیوەشەودا
چاوم چووە خەو لە شیرین خەودا
چوومە مەرکەزی مدیر نشینی
ساحێب قانوونات عزز و تەمکینی
بە شەرع و قانوون پیاوی دەوڵەتمەند
گەدای باڵ ئەبەست ئەیخستە پێوەند
هەرکەسێ خاوەن پارە و دینار بوو
لای مدیر ماقووڵ لە عام دیار بوو
ئەوەش هەژار بێ هەرقوڕ بپێوێ
بە شەقی پۆلیس تاوێ نەسرەوێ
زۆر زۆر سەرخۆش بووم لەم عەداڵەتە
لەم سەرکەوتنە و لەم سەعادەتە
بۆ تێگەیشتن وەزعی زەمانە
تەنها و بێ ڕەفێق چوومە چاخانە
کە ڕوانیم هیچ کەس هیچ کەس نادوێنێ
هەر یەک ڕۆژنامەی شارلک ئەخوێنێ
یەکێ تورکی بوو یەکێ بە فارسی
یەکێ ئەرمەنی، یەکێ چەرکەسی
کە ڕوانیم مدیر بە پێچەوانە
جەریدە ئەگرێ لەناو ئەوانە
تومەس کابرایێ نەخوێندەوارە
بە دەردی جەهل تەواو بیمارە
فەقەت بیستوویە مەئمورانی شار
جەریدە ئەکڕن بە پارە و دینار
ئەمیش یەعنی ها، منیش مدیرم
خوێندەواری چاک بە دەرک و بیرم
لەبەر چاو خەڵقا جەریدەی ئەبرد
ئەمما سەرەوژێر تەماشای ئەکرد
منیش دانیشتم هەر وەکوو ئەوان
بانگم کرد چاچی بۆم بێنە «ژیان»
من کە خۆم کوردم، کوردی زوانم
بە ڕۆح کڕیدار وتەی «ژیان»م
وتی بابە گیان «ژیان»م نییە
کوزی بەر ئاگر قیمەتی چییە؟
بۆچی نازانی ئێمە نەزانیین
حەز بە خەڵک ئەکەین دوژمن خۆمانیین
کوڕمان بە کچ خەڵک ئەگۆڕینەوە
وەها ئەزانیین ئەیدۆزێنەوە
ئەگەر وانەبین ئێمەش وەک یاران
ئەگەینە هەوار منزڵگای ژیان