ڕووبەڕووی دوژمن

بمانگرن، بمانکوژن، بمانبڕن
هەرچی دێیە لەسەر ڕێیە کە ئەیگەنێ بیسووتێنن
بیڕووخێنن، تاڵانی کەن، وێرانی کەن
قڕی تێخەن
هەرچی شاری کوردستانە بەدەستانە
خواردەمەنی لێ ببڕن با بشمرن
مناڵ و لاو، ژن و پیاو
پیری کەنەفتەی کۆماوە
بە ئاستەم هێزی تیا ماوە
وەک ڕان پێش خۆتانیان بدەن
بەندیان بکەن، لەناویان بەن
بەر گوللەبارانیان بدەن
بێ دادگا شەهیدیان کەن
یان لە هەموو ڕێ و کۆڵانێ
لە گشت لایەک لەهەر شەقام و پەنایەک
سێدارەی زۆر
ئەڵقەی پەت شۆڕ
دانێن، هەڵخەن، هیچ سڵ مەکەن
بماگرن، بمانکوژن، بمانبڕن
هەر بۆ ئەوەی کۆیلەتان بین
بڵێی چی بن، ئێمەش ئەوەین
ئەی سا ئەمەی ئێوە ئەیکەن هێشتا کەمە
سەد ئەوەندەش دڕندە بن
بمانگرن، بمانکوژن، بمانبڕن
بێمننەت بن
ئێمە کوردین
بۆ کورد ئەژین، بۆ کورد ئەمرین
تا دنیا بێ زەوی مابێ قەت نانەوین
کوردایەتیی ئایینمانە، ژیانمانە
بڕوامانە، خۆراکی هەست و گیانمانە، ژیانمانە
ئەوەی ئێوە خەیاڵی ئەکەن. بۆی هەوڵ ئەدەن
زۆر ستەمە قەت پێی ناگەن
زیاتر خۆش بن سوور و جۆش بن
لەسەر ئەوەی
بمانگرن، بمانکوژن
وتووومانە و ئەیڵێینەوە
ڕاستییە و نایپێچینەوە
ئەیڵێینەوە بە ئاشکرا
بۆ گشت دنیا
کوردین هەتا دنیا مابێ
مرۆڤ لەسەر زەوی مابێ
قەت نابەزین
کوردین کوردین
سەربەرزیی ئێمە تا بێ بەرزتر ئەبێ
بە هەرچی هێزە نانەوێ
چی ئەتوانن
ڕامەوەستن
بیخەنە کار
زیاتر لەو جار
لێمان ڕوونە و ئەنجامتان هەر شکاندنە
لە کوردستان دەرکردنە
بۆیە ئەیڵێین وشەیەکە و وتوومانە
کوردستانین قەت نابەزین
قەت ناترسین، قەت نانەوین
بمانگرن، بمانکوژن، بمانبڕن
هیچ دەربەست نین ئێمە کوردین
هەتاهەتاش ئەیڵێینەوە
لە مردن ناسڵەمینەوە